Hari umubare munini w’abaturage batuye mu Ntara za Kivu y’Amajyepfo n’iy’Amajyaruguru bakomeje kuzamura amajwi agaragaza ko babangamiwe bikomeye n’ibikorwa by’ubunyamaswa by’umutwe w’iterabwoba wa FDLR.
Ni mu gihe Perezida Tshisekedi “Cyabitama” hamwe n’abo bafatanya gutegeka Congo bo badasiba kumvikana babeshya amahanga ku manywa y’ihangu ko FDLR “nta kibazo iteje” ahubwo ko ngo “igizwe n’Abanyarwanda bahirimbanira kuzisubiza uburenganzira bakagaruka mu gihugu cyabo.”
Abaturage binubira FDLR bamaze iminsi bumvikana mu itangazamakuru rikorera imbere muri Congo ndetse n’itangazamakuru mpuzamahanga, aho mu bigaragarira buri wese aba baturage bavuguruza umurongo abategetsi babo bafashe wo kweza ibikorwa bya FDLR.
Nk’urugero, hari umunyekongo uherutse kwandika ku mbuga nkoranyambaga ati: “…ibaze ko duteka ibiryo, twarangiza tukabahunga (FDLR) tukajya kwihisha mu bihuru. Ikibabaje ni ukuntu tugaruka tugasanga baducucuye, nta kintu badusigiye,I byacu byose babisahuye. Bava mu mashyamba, bakavayo bakaza kwica abaturage b’inzirakarengane,babicisha imihoro.”
Nk’uko babishimangira, kubwo kwisanga ikibazo cya FDLR nta muti ushoboka bateze kuzakibonera mu gihe ubuyobozi butakibacyemurira, bamwe mu baturage bahisemo guhungira mu bihuru, abandi bahitamo guhungira mu bihugu by’ibituranyi birimo u Rwanda na Uganda.
Ikibabaje kurusha ibindi, nk’uko aba baturage babisobanura, nuko batabaza inzego z’umutekano ngo zibakize abicanyi ba FDLR ariko zikabima amatwi.
Ni mu gihe ubutegetsi bwa Tshisekedi bwamaze kwinjiza umubare munini w’abagize FDLR mu gisirikare cy’igihugu (FARDC), nk’uko byahishuwe na raporo zinyuranye zirimo iy’Umuryango w’Abibumbye, iy’Umuryango Mpuzamahanga uharanira uburenganzira bwa muntu (HRW) n’izindi.
Ikibazo cyo guhungabanya umutekano cya FDLR si icy’abaturage ba Congo gusa, ahubwo guhangayikishije n’u Rwanda kuko nk’urugero umwaka ushize uyu mutwe warashe ibisasu ku butaka bw’u Rwanda inshuro zirenga eshatu.
Ni mu gihe kandi FDLR idasiba gukubita agatoki ku kandi ivuga ko izagaruka mu Rwanda “gusoza” Jenoside yakorewe Abatutsi kuko ku bwayo itigeze irangira aho abenshi mu bayobozi b’uyu mutwe bavuga ko bashaka u Rwanda “rutarangwamo umututsi”!
Gusa ibyo abatsimbaraye ku mahame y’ubwiyahuzi ya FDLR bavuga byose barishuka kuko uwabatsinze ntaho yagiye.
Marc Ndayambaje