Perezida Paul Kagame wamaze gushimangira ko ari umukunzi ukomeye wa Arsenal yashimiye iyi kipe yo mu Bwongereza nyuma y’uko kuri iki Cyumweru tariki ya 6 Kanama 2023 yegukanye Igikombe cya Community Shield, itsinze Manchester City kuri penaliti 4-1.
Mu butumwa Perezida Kagame yasangije abamukurikira kuri Twitter nyuma y’uriya mukino, ntayahishe amarangamutima aho yashimangiye ko anejejwe n’intsinzi ya Arsenal. Yanditse ati: “Mwakoze cyane Arsenal. Birerekana ibyo kwitega mu bihe biri imbere. Ni iby’igikundiro.”
Igikombe cya Community Shield gihatanirwa n’ikipe yatwaye Shampiyona n’iyatwaye FA Cup mu mwaka w’imikino uba wabanjirije uwo mukino, gusa nk’uko amategeko abiteganya iyo hari iyabitwaye byombi, iyabaye iya kabiri muri Shamipiyona niyo iwukina.
Niyo mpamvu Manchester yahuye na Arsenal kuko Manchester yatwaye Shampiyona na FA Cup mu gihe Arsenal yo yabaye iya kabiri mu mwaka wa shampiyona ushize.
Perezida Kagame ubusanzwe ni umukunzi wa siporo aho by’umwihariko ashishikariza abandi bantu kuyitabira kuko ayigeranya n’ umwarimu wigisha indangagciro, kwiyoroshya, gukorera hamwe no kwicisha bugufi.
Karemera Jean Luc