Ubwo hasozwaga icyumweru cy’icyunamo ku italiki 13 Mata 2024, ku rwibutso rwa Rebero ahasanzwe hibukirwa abanyapolitike bishwe bazira ibitekerezo byabo byo kwitandukanya n’ubutegetsi bwariho bakarwanya Jenoside yakorewe Abatutsi, Amazina icyenda y’abandi banyapolitike barwanyije Jenoside yakorewe Abatutsi mu 1994 yongewe muri urwo rwibutso.
Abo banyapolitike ni: Ngulinzira Boniface, Dr. Habyarimana Jean Baptiste, Ruzindana Godefroid, Rwabukwisi Vincent, Ndagijimana Callixte, Nyagasaza Narcisse, Gisagara Jean Marie Vianney, Dr. Gafaranga Théoneste, Prof Rumiya Jean Gualbert
Urwibutso rwa Rebero rusanzwe rwibukirwamo abanyapolitike bitandukanyije n’ubutegetsi bwakoze Jenoside yakorewe abatutsi kugeza ubwo bahasize ubuzima.
Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, yagarutse ku butwari bwaranze politike yabo aho yagize ati “Kugaragaza no kumenyekanisha ibikorwa by’indakemwa byabaranze, ni intambwe yo gukomeza guhesha icyubahiro politike nziza yubaka igihugu, politike ishimangira ubumwe n’ubudaheranwa by’Abanyarwanda,”
Ku rundi ruhande Interahamwe n’ibigarasha nkuko bisanzwe iyo u Rwanda rugeze mu bihe byo kwibuka Jenoside yakorewe Abatutsi, badukana umuvuno wo kugoreka amateka bavuga ko abahutu bishwe na FPR Inkotanyi by’umwihariko ko bakwiye kujya nabo bibukwa, bikavaho kuba Jenoside yakorewe abatutsi ahubwo ikaba iyakorewe abanyarwanda bose. Ibyo ni ugupfobya no kugoreka cyane ko FPR itigeze na rimwe ireka guha icyubahiro abatarahigwaga bishwe bazira ukuri n’ibitekerezo byabo.
Urugero rwa hafi ni nk’iki gikorwa cyabaye cyo kongera abanyapolitike barwanyije Jenoside yakorewe Abatutsi mu 1994 m’ Urwibutso rwa Rebero. Iki gikorwa cyabaye ubwo hasozwaga icyunamo gikwiye gusigira isomo interahamwe n’ibigarasha ryerekana uburyo hari abanze kwivanga mu mabi, ahubwo bari bashyigikiye ubumwe bw’abanyarwanda, banarwanya by’umwihariko umugambi wo gutsemba abatutsi kugeza naho babizize bakicwa.
Linda Mukobwajana
Abandi banyepolitike barwanyije Jenoside yakorewe Abatutsi mu 1994 bongewe mu rwibutso rwa Rebero, indi ntambwe ibeshyuza abagoreka amateka
