‘Mituweli’ igiye kujya yishyura kuyungurura amaraso, gusimbuza impyiko…, interahamwe n’ibigarasha noneho murihisha he?

Inama y’Abaminisitiri yateranye ku wa 17 Mutarama 2025 yemeje ko ubwishingizi bwa Mituweli busanzwe bukoreshwa n’Abanyarwanda bagera kuri 92% bwongerewemo serivisi 14 nshya z’ubuvuzi ubusanzwe zitapfaga kwigonderwa na buri wese – iyi ni inkuru ivuguruza icengezamatwara ry’interahamwe n’ibigarasha basanzwe babeshya ko ubuyobozi bw’u Rwanda “butita ku mibereho y’umuturage”.

Muri serivisi z’ubuzima zigiye kujya zishyurwa na mituweli harimo ubuvuzi bwa kanseri, umutima, kuyungurura amaraso, gusimbuza impyiko, kubaga bigezweho hakoreshejwe ikoranabuhanga nko kubaga umutwe w’igufa ryo mu kuguru, mu ivi, urutirigongo n’ahandi, ndetse n’ibijyanye n’insimburangingo n’inyunganirangingo.

See more

Inama y'Abaminisitiri yateranye ku wa 17 Mutarama 2025 yemeje ingamba zo mu rwego rw'ubuzima zikurikira:

– Kongera serivisi zubuvuzi zishingirwa n'ubwisungane hamwe n'inkomoko y'inyongera y'amafaranga yo kunganira gahunda y'ubwisungane mu kwivuza (Mituweli).

– Ivugururwa… pic.twitter.com/tWoBMGYSsF

— Ministry of Health | Rwanda (@RwandaHealth) January 18, 2025

Ku rundi ruhande, interahamwe n’ibigarasha bikunze kumvikana bikwiza ibinyoma by’uko ubuyobozi bw’u Rwanda “nta cyo bumariye abanyarwanda uretse kubasahura gusa”, mu by’ukuri hagamijwe gusiga icyasha no kwangisha Abanyarwanda ubuyobozi bitoreye.

Iyi gahunda nziza ya Guverinoma y’u Rwanda yo korohereza Abanyarwanda mu bijyanye no kwivuza ni kimwe mu bikorwa binyomoza abo banzi b’u Rwanda birirwa babunza amagambo gusa nyuma y’uko indi mitego yose irimo ibitero by’iterabwoba, intambara k’u Rwanda n’ibindi bibapfubanye maze bagasigara bimyiza imoso.

Ipfunwe n’ikimwaro by’interahamwe ry’uko babona aho u Rwanda rugeze bitandukanye cyane n’u Rwanda basize basenye biri mu mpamvu zikomeye zituma bakaza umugambi wo gusebya ubuyobozi bw’u Rwanda, ibyo bakabikora birengagije ko ibyo ubu buyobozi bumaze kugeza ku Banyarwanda byivugira.

Aba kandi bakwiye kumenya ko ibyo bakora byose bitazakuraho ko Leta y’u Rwanda ishyira umuturage ku isonga, bityo rero bashatse bacisha macye bakareka guta umwanya w’ubusa.

Mukobwajana Linda