Ku munsi nk’uyu, tariki ya 19 Kamena 1994, interahamwe zari zikomeje umugambi wo kwica Abatutsi hirya no hino mu gihugu, ubwicanyi mu Mujyi wa Kigali bwagizwemo uruhare rukomeye na Padiri Wenceslas Munyeshyaka magingo aya ubarizwa mu Bufaransa.
By’umwihariko, muri Kiriziya ya Sainte Famille, abicanyi bazaga igihe bashakiye bagatwara abo bica,babifashijwemo na Padiri Munyeshyaka, cyane cyane ko iyo kiriziya yari igoswe iminsi yose n’abajandarume n’interahamwe ku buryo no kuhinjira ku mpunzi z’Abatutsi zahahungiraga byari bigoye.
Kuri iyi tariki abicanyi bari kumwe na Col Munyakazi Laurent, Angeline Mukandutiye, Odeta Nyirabagenzi, Kamatamu Euphrasie, Col Renzaho Tharcisse na Padiri Munyeshyakabongeye gutwara abandi basore b’Abatutsi bagera kuri 17 bajya kubica.
Mu batwawe harimo Rubashankwaya Bonaventure wakoraga muri MINIFINECO (Ministre des Finances et Economie), Munyensanga JMV, Athanase, Aloys, Ignace, Kasongo, Alexandre, Jean Damascène, Safari, Jean Pierre n’abandi batashoboye kumenywa umwirondoro nk’uko bigaragara mu rubanza rwa Gen. Maj. Munyakazi Laurent rwaciwe n’urukiko rukuru rwa gisilikare ku wa 16/11/2006.
Paruwasi ya Sainte Famille na Centre National de Pastorale Saint Paul ni hamwe mu hantu hakomeye ha Kiliziya Gatorika mu Mujyi wa Kigali, kuba Abatutsi barahahungiye nuko bari bahizeye umutekano kandi bizeye ko basanze abantu b’Imana babakira neza uko bikwiye.
Mu babishe harimo abakristu basenganaga buri cyumweru, cyangwa bumvanaga Misa ya buri gitondo. Harimo n’abihaye Imana barangajwe imbere na Padiri Munyeshyaka Wenceslas wagize uruhare runini mu kugambanira Abatutsi, kubucira no gusambanya abakobwa ku gahato.
Mukobwajana Linda