Croatia yatsinze Morocco ibitego 2-1 mu mukino w’umwanya wa gatatu w’igikombe cy’Isi kiri kubera muri Qatar.
Ni umukino wabaye kuri uyu wa Gatandatu tariki ya 17 Ukuboza 2022.
Impande zombi zatsinze igitego mu minota 10 ya mbere y’umukino kuko Josko Gvardiol wa Croatia yafunguye amazamu ku munota wa karindwi mbere yuko Achraf Dari agombora Morocco nyuma y’iminota ibiri gusa.
Mislav Orsic yaje gutsinda igitego cy’intsinzi ku munota wa 42 mbere y’uko bajya mu karuhuko mu gice cya kabiri.
Morocco yakoze ibishoboka byose kugira ngo inganye byibuza bajye muri za penaliti ariko biba ibyubusa, aho Youssef En-Nesyri yabonye amahirwe meza mu minota ya nyuma, ariko ntiyabasha gutsinda.
Kuri iki Cyumweru tariki ya 18 Ukuboza 2022 saa kumi n’imwe (ku isaha y’i Kigali) hateganyijwe umukino wa nyuma aho u Bufaransa bukina na Argentine kuri Sitade ya Lusail.
Karemera Jean Luc