Ikipe y’Igihugu ‘Amavubi’ kuri uyu wa Gatatu tariki ya 29 Werurwe 2023 yanganyije n’iya Benin igitego 1 – 1 mu mukino wabereye i Kigali kuri Pele Stadium mu marushanwa yo gushaka itike y’Igikombe cya Afurika (CAN) kizabera muri Cote d’ivoire Umwaka utaha.
Benin niyo yinjije bwa mbere igitego cyatsinzwe ku munota wa 56 na Jodel Dossou wacenze umunyezamu Ntwari Fiacre nyuma y’amakosa akomeye ya ba myungariro b’Amavubi.
Amavubi yakomeje gusatira cyane Benini aho ku munota wa 70 Manzi Thierry yaje kwishyura igitego n’umutwe ku mupira wari uvuye kuri Kagere nyuma yo guterwa na Muhire Kevin kuri koruneri.
Hagati aho mu gice cya mbere Amavubi yabonye penaliti ku ikosa ryakozwe na myugariro wa Benini aho yakoze ku mupira n’ukuboko, gusa iyi penaliti yahushijwe na Rafael York w’Amavubi.
Nyuma y’uyu mukino, Amavubi yagumye ku mwanya wa Gatatu aho afite amanota atatu naho Benin yo iguma ku mwanya wa nyuma n’amanota abiri, ni mu gihe itsinda L Amavubi abarizwamo riyobowe na Senegal n’amanota 12.
Amavubi afite undi mukino mu kwezi kwa Gatandatu aho azahura na Mozambique, ni mu gihe mu kwezi kwa cyenda ho azakina na Senegal.
Karemera Jean Luc