Umumotsi w’interahamwe n’abajenosideri bibumbiye mu gatsiko ka ‘FDU-Inkingi’, Musabyimana Gaspard, yatangiye gukoranya imiryango y’abajenosideri bagamije kugoreka amateka y’u Rwanda mu gihe Abanyarwanda bari kwibuka ku nshuro ya 29 Jenoside yakorewe Abatutsi.
Mu kiganiro uyu muhezanguni aherutse gukorera ku muzindaro rutwitsi wa FDU-Inkingi ari kumwe na Marie Claire Ayingeneye, umukobwa wa Emmanuel Ayingeneye wari umutoni ku ngoma ya kinani Habyarimana ndetse akaba yari n’umuganga we wihariye, bumvikanye bapfobya Jenoside yakorewe Abatutsi ari nako bibasira ingabo za RPA/F zayihagaritse.
Muri icyo kiganiro mwene Ayingeneye yumvikanye abeshya ko ingabo zari iza RPA “zahanuye indege yari itwaye Habyarimana na se” bituma habaho Jenoside yongeraho ko bateganya kuzatanga ikirego mu nkiko.
Ni mu gihe nyamara amateka agaragaza ko Jenoside yakorewe Abatutsi yateguwe kuva mu 1957, ndetse iranageragezwa mu bice butandukanye by’umwihariko iza gushyirwa mu bikorwa muri Mata 1994.
Bamwe mu bagize uruhare muri Jenoside kimwe n’imiryango yabo usanga bashaka kuyobya uburari bagahakana ko ntayabaye ko ngo ahubwo habaye “ubwicanyi’’ ndetse nabwo byatewe n’ihanurwa ry’iriya ndegendege, gusa iri ni icengezamatwara rishaje cyane ko amateka ahari abisobanura neza.
Tariki ya 15 Gashyantare 2020 ni bwo Urukiko rusesa Imanza mu Bufaransa rwatangaje ko rwafunze burundu dosiye y’iperereza ku ihanurwa ry’indege ya Habyarimana nyuma yo gutesha agaciro ubujurire bw’imiryango y’abayiguyemo.
Ingabo zari iza RPA-Inkotanyi, zahagaritse Jenoside yakorerwaga Abatutsi ndetse zinayobora urugamba rwo kubohora igihugu, ibintu bitigeze bishimisha na gato intagondwa z’interahamwe zatorotse ubutabera bw’u Rwanda.
Gusa icyo izi ntagondwa zikwiye kumenya ni uko abanyarwanda by’umwihariko abarokotse Jenoside yakorewe Abatutsi batazigera bemera ushaka kubagorekera amateka mu nyungu ze.
Umulisa Carol