Muri iyi weekend Shampiyona y’icyiciro cya mbere y’U Rwanda yarakomeje hakinwa imikino yo ku munsi wa 30. Amakipe atatu arwanira igikombe Kiyovu Sport, APR FC na Rayon Sports yose yakinnye ku Cyumweru akinira amasaha amwe. Kiyovu Sport yitwaye neza igumana umwanya wa mbere nyuma yo gutsinda Musaze iyisanze iwayo ibitego 2-1.
Rayon sports yatakaje amanota atatu ndetse n’umwanya wa kabiri nyuma yo kunyagirwa na Gorilla ibitego 3-1. APR FC yatsinze ikipe ya Espoir yamaze gusubira mu cyiciro cya kabiri, ibitego 2 -1 yigarurira umwanya wa kabiri ikarushwa amanota atatu n’ikipe ya mbere ariyo Kiyovu Sport.
Harabura imikino ibiri gusa kugirango Shampiyona ishyirweho akadomo. Kiyovu irasabwa amanota ane mu manota 6 kugirango yegukane igikombe nyuma y’imyaka 30 itagikozaho intoki.
Real Madrid yegukanye Copa del Rey
Real Madrid yegukanye Igikombe cy’Umwami muri Espagne (Copa del Rey), nyuma yo gutsinda Osasuna ibitego 2-1 ku mukino wa nyuma wabaye ku wa Gatandatu tariki 6 Gicurasi 2023, igikombe yaherukaga gutwara muri 2014.
Real Madrid yari yarasezereye mukeba wayo FC Barcelona ku giteranyo cy’ibitego 4-1, naho Osasuna yari yasezereye Athletic Club Bilbao ku giteranyo cy’ibitego 2-1.
Shampiyona y’Abongereza yari yakomeje (Premier league)
Frank Lampard utoza ikipe ya Chelsea yabonye intsinzi ya mbere nyuma y’imikino 9 atabona intsinzi, aho yatsinze ikipe ya AFC Bournemouth ibitego 3-1.
Manchester City na Arsenal nazo zabonye amanota atatu bituma zikomeza urugamba rwo gushaka igikombe, Manchester City yatsinze Leeds united ibitego 2-1, naho Arsenal itsinda Newcastle united ibitego 2 -0.
Manchester United yaje gutsindwa na Westham United kuri iki cyumweru bituma itakaza amahirwe y’umwanya wa gatatu.
Karemera Jean Luc