Mu mpera z’icyumweru gishize, shampiyona ikomeye ku Mugabane w’i Burayi ya Premier League yarakomeje, aho yaranzwe no kongera gutsikira kwa Arsenal, ni mu gihe Manchester City bahanganiye igikombe itari gukora ikosa na rimwe.
Arsenal yari yakiriwe na Westham United ku kibuga cya London Stadium ku Cyumweru, yananiwe guhagarara ku bitego bibiri yari yatsinze Westham mu minota 10 ya mbere, bitsinzwe na Gabriel Jesus ku munota wa 7’, Martin Ødegaard ku munota wa 10’, aho umukino warangiye amakipe yombi aganyije ibitego 2-2.
Nyuma yo gutsinda ibitego bibiri abakinyi ba Arsenal bagaragaje kuregeza cyane bituma Westham ibagombora igitego ku munota 34’ kuri penaliti ya Saïd Benrahma.
Igice cya kabiri cyatangiye Westham ifite ingufu nyinshi kurusha Arsenal. Ku munota wa 52, Bukayo Saka yahushije penaliti ateye umupira kure y’izamu. Westham United yaje kubona igitego cya kabiri ku munota wa 54 ndetse ikomeza no guhusha byinshi.
Uyu ni umukino wa kabiri wikurikinya Arsenal igomborwa ibitego bibiri yabanje gutsinda. Umukino ubanja nabwo yatsinze Liverpool ibitego bibiri, Liverpool irabyishyura, umukino urangira banganyije 2-2.
Manchester city ihanganiye igikombe na Arsenal kuwa Gatandatu yari yatsinze ikipe ya Leicester ibitego 3-1. Kuri ubu urutonde rwa shampiyona Arsenal iracyayoboye n’amanota 74, ikurikiwe na Manchester City ifite 70 n’umukino w’ ikirarane itarakina.
Nyuma yuko Arsenal imaze imikino ibiri idatsinda bigatuma Manchester City iyisatira, hategerezanijwe amatsiko menshi umukino uzahuza amakipe yombi ku itariki 26 z’ukwa Kane.
Ese Arsenal irakora iyo bwabaga itware igikombe baherukaga gutwara muri 2003/2004, Bukayo Saka agikambakamba, cyangwa Manchester City irakisubiza? Nibyo gutegwa amaso.
Karemera Jean Luc