Ikipe ya Chelsea itozwa na Frank Lampard wanayikiniye, ikomeje kubura itsinzi nyuma yo gutsindwa n’ikipe ya Arsenal iri kurwanira igikombe cya Shampiyona.
Ni umukino wakinywe ku munsi wa 34 wa Shampiyona ku amakipe yombi, aho Arsenal yatsindiye ikipe ya Chelsea ibitego 3 – 1, ku kibuga cyayo Emirates Stadium.
Ikipe ya Arsenal ubu iri kurwanira igikombe n’ikipe ya Manchester City yaje mu mukino ishaka gutsinda byanze bikunze kugirango ibashe gukomeza guhangana na Manchester City.
Ibitego byose uko ari bitatu bya Arsenal byijiyemo mu gice cya mbere, bitsinzwe na Martin Ødegaard watsinzemo 2, ku munota wa 18 na 31. Icya gatatu cyaje gutsindwa na Gabriel Jesus ku munota wa 34, naho igitego Kimwe rukumbi cya Chelsea cyatsinzwe na Noni Madueke ku munota wa 65.
Chelsea itsinzwe ku nshuro ya gatandatu yikurikiranye kuva Frank Lampard agarutse kuba umutoza w’agateganyo, bikaba imikino 9 yikurikiranye itabona itsinzi n’imwe. Umunyamakuru akaba n’umuseseguzi Jamie Carragher wanakiniye ikipe ya Liverpool, yanenze ibyemezo bya Todd Boehly bibi yagiye afata kuva akigura iyi kipe muri Gicurasi umwaka ushize. Yanavuze ko ibi nibikomeza bishobora kuba bibi ku umutoza Frank Lampard ndetse n’abamushyigikiye.
Arsenal yahise iyobora urutonde n’amanota 78, ikarusha amanota abiri ikipe ya Manchester City yo ifite umukino kuriuyu mugoroba n’ikipe ya Westham United. Naho Chelsea yahise iguma mu makipe 10 ya nyuma ku mwanya wa 12 n’amanota 39.
Karemera Jean Luc