Bujumbura: Inama ku ishyirwa mu bikorwa ry’amasezerano y’ amahoro muri RDC ikwiye guhanura Tshisekedi n’ubutegetsi bwe by’umwihariko
Kuri uyu wa Gatandatu I Bujumbura mu Burundi hateraniye inama ya 11 ku ishyirwa mu bikorwa ry’Amasezerano y’Amahoro, Umutekano n’ Ubutwererane muri Repubulika Iharanira Demokarasi ya Congo no mu karere k’ Ibiyaga Bigari.
Iyi nama yitabiriwe n’abakuru b’ibihugu byo mu Karere, abo mu bihugu by’ Afurika batandukanye ndetse n’Umunyamabanga Mukuru w’Umuryango w’Abibumbye, Antonio Guterres gusa igikomeje kwibazwaho ni ingamba aba bayobozi baribufate nyuma y’uko bimaze kugaragara ko ubutegetsi bwa Tshisekedi bwakomeje kugaragaza ko budashishikazwe no kubahiriza amasezerano yashyizweho kugirango amahoro agaruke mu Karere.
Umuryango w’Abibumbye, Afurika Yunze Ubumwe n’ibindi bihugu by’ibihangange ku isi byagiye byerekana ko bishyigikiye Amasezerano ya Nairobi na Luanda nk’igisubizo kirambye mu kugarura amahoro mu burasirazuba bwa Congo, gusa kuri Tshisekedi n’ubutegetsi bwe sibyo bibaraje inshinga kuko bashyize imbaraga mu kurwanya izi nzira z’amahoro zashyizweho.
Ingabo z’Umuryango w’Afurika y’Uburasirazuba zakoze ibishoboka byose ngo zigarure amahoro mu burasirazuba bwa Congo ndetse n’umutwe wa M23 wubahiriza ibyo wasabwe utanga twinshi mu duce wari warafashe, gusa ibyo byose kuri Tshisekedi n’ubutegetsi bwe baracyanangiriye ntibashaka kuganira n’ umutwe wa M23, nkuko byari biteganyijwe.
Mu minsi ishize Umugaba w’Ingabo z’Umuryango wa Afurika y’Iburasirazuba Gen. Jeff Nyagah yareguye anagaragaza ko ubutegetsi bwa Congo bwashatse kumwambura ubuzima kubera kwanga kugaba ibitero kuri M23. Gen. Nyagah yavuzeko ubutegetsi bwa Congo bukomeje kwanga gukemura ibibazo binyuze mu nzira za politiki nk’uko amasezerano abiteganya. Ahubwo bwifatiye indi nzira yo guteza akaduruvayo biciye mu mitwe yitwaje intwaro.
Ubutegetsi bwa Congo bukomeje gutera inkunga no gufasha imitwe yitwaje intwaro mu gukomeza guhungabanya umutekano mu burasirazuba bwa Congo. Ubukangurambaga bwagashoza ntambara bugenda bukorwa n’ubuyobozi bwa Congo bwatumye imitwe yitwaje intwaro yiyongera, ubu imitwe yitwaje intwaro ibarirwa muri 266.
Bimaze kugaragara ko Inama nyinshi zagiye ziterana zigamije kwiga ku mahoro mu karere, ibyemezo byafatwaga byose Tshisekedi yamaraga gusubira muri Congo agakora ibihabanye nabyo.
Abateraniye mu nama I Bujumbura bakwiye kwereka Tshisekedi n’ubutegetsi bwe ko aribo bakoma mu nkokora gahunda yo kugarura amahoro muri Congo, cyane ko ibyo busabwa byose butajya bubishyira mu bikorwa.
Aba bayobozi kandi bakwiye gusaba Tshisekedi n’ ubutegetsi gukemura ibibazo binyuze mu nzira za politiki, zubaha amasezerano yashyizweho aganisha ku mahoro kuko ari wo muti urambye wo kugarura amahoro mu burasirazuba bwa Congo.
Mugenzi Félix
About Author
