Ndayishimiye nashyire umupira hase maze abane neza n’umuturanyi we mushya w’i Uvira!
Umunyagitugu Ndayishimiye uyobora u Burundi washegeshwe bikomeye no gutsindwa kw’ingabo ze muri Uvira, akomeje gusaza imigeri apfukamira ihuriro AFC/M23 ngo ingabo ze zatorongereye muri Kivu y’amajyepfo zihabwe inzira zitahuke mu gihe ku rundi ruhande agerageza guca inyuma iri huriro arigabaho ibitero.
Ababikurikiranira ibintu hafi bemeza ko uyu mukino Ndayishimiye ari kwishoramo ashobora kuzawicuza bidatinze.
Dore nk’ubu hari batayo zigera kuri eshatu z’ingabo uyu munyagitugu yohereje kurinda umujyi wa Baraka bose bari mu gihirahiro bibaza impamvu Perezida Ndayishimiye abatoranya mu bandi maze akanga ko batahuka mu gihugu cyabo nk’uko byagenze kuri bagenzi babo bari muri Uvira n’inkengero zaho.
Mu kumwereka ko batishimiye icyemezo yabafatiye, abo basirikare bahakanye kongera kwikoza impuzankano y’igisirikare cya Tshisekedi, amayeri Ndayishimiye yumvikanye na sebuja bagamije guhishira amabi akorwa n’izi ngabo ze.
Abo basirikare bibaza uburyo Ndayishimiye yishuka ko bazahangara AFC/M23 yatsinze uruhenu itsinda ry’abarwanyi 24,000.
Basanga bidakwiye ko bakomeza gupfira mu mashyamba nk’imbwa z’agasozi babeshya ko ari abasirikare ba Congo.
Aba bacanshuro ba Ndayishimiye kandi bemeza ko yaba Ndayishimiye ubwe ndetse n’abayobozi bakuru b’ingabo bazi neza ko intambara bishoyemo badateze kuyitsinda cyane ko na n’ubu batumva impamvu yayo maze hakwiyongeraho n’amayeri y’intambara atakigezweho bakoresha bikarushaho guhumira ku mirari.
K’ubw’ibi byose ubuyobozi bwabo buzi, bakomeza bibaza impamvu bahatirwa intambara badateze gutsinda?
Kuri Ndayishimiye, ibi ni ukuri kuryana mu matwi: Hamwe n’ingabo zitakarije icyizere, batateguwe haba ku buryo bw’imyumvire ndetse n’ibikoresho, nta ngingo n’imwe irengera Ndayishimiye mu ntambara arwana muri Congo.
Amakuru yizewe aremeza ko Ndayishimiye utaranyuzwe n’isomo yaherewe kuva Bunagana kugera Uvira akomeje kurunda ingabo nyinshi mu ntara ya Cibitoke ihana imbibi n’u Rwanda ndetse na Congo, aho bivugwa ko yaba ategura kongera kugaba ibitero ku birindiro bya AFC/M23 ku ruhande rwa Congo.
Ndayishimiye yakabaye atekereza kabiri akibuka ingaruka z’intambara AFC/M23 n’igisirikare cye mu gace ka Kamanyola. Amahanga akwiye kuba maso kuri ubu buhubutsi bw’uyu munyagitugu n’ingaruka bushobora kuzateza.
Ndayishimiye akwiye kureka kwishyira mu rwego adakwiye. Yaba Uvira, yaba ikibaya cya Rusizi nta bushobozi ingabo ze zifite bwo kuhisubiza.
Amahirwe yonyine asigaye kuri Ndayishimiye, ni ugushyira agapira hasi maze akabana amahoro n’abaturanyi be bashya. Nta gushidikanya ko ari nayo nama ubuyobozi bw’ingabo ze buzamugira.
Biraro Erneste
About Author
