Inkuru nziza kuri CoronaVirus : Ministeri y’ubuzima yatangaje ko mu minsi mike umurwayi wambere ashobora gusezererwa agataha

Minisiteri y’Ubuzima mu Rwanda yatangaje ko yizera ko mu mpera z’iki cyumweru, umurwayi wa mbere ndetse n’umufasha we bagaragaweho na COVID-19 iterwa na Coronavirus, bashobora kurekurwa bagataha kuko ubu nta kibazo bagifite.

Tariki 14 uku kwezi nibwo Minisiteri y’Ubuzima yemeje ko Umuhinde wageze mu Rwanda ku wa 8 Werurwe 2020 avuye i Mumbai, ariwe watahuweho icyorezo cya COVID-19.

Nyuma y’iminsi ine gusa, ni ukuvuga tariki 18 Werurwe, umugore w’uyu Muhinde nawe yagaragaweho n’iki cyorezo atangira kwitabwaho.

Kugeza ubu Minisiteri y’Ubuzima yatangaje ko umubare w’abantu banduye COVID-19 mu Rwanda wageze kuri 36, nyuma y’uko kuri uyu wa Mbere tariki 23 hagaragaye abandi 17 biganjemo abaheruka mu ngendo bakoreye hanze y’igihugu.

Aba bose barimo kwitabwaho mu kigo nderabuzima cya Kanyinya giherereye mu karere ka Nyarugenge mu Mujyi wa Kigali.

Minisitiri w’Ubuzima, Dr Ngamije Daniel, yemeje ko kugeza ubu aba barwayi barimo kwitabwaho n’abaganga b’inzobere, ku buryo abageze muri ibi bitaro mbere bashobora gukira bagataha.

Yagize ati “Turizera ko mu mpera z’iki cyumweru turimo, umurwayi wa mbere ndetse n’umufasha we kuko bari hamwe tugomba kubarekura cyane ko nta kibazo bafite, ubu bameze neza ariko dutegereje gusa ko iminsi bagenewe igera tukabasuzuma tukamenya ko nta bwandu bagifite mu mubiri, tukabarekura bagataha kuko bameze neza.”

Dr Ngamije kandi yavuze ko n’abandi barwayi bahari bafite abaganga bahagije, ndetse n’abana bato bahari bakaba bafite abaganga b’inzobere babavura ku buryo nta kibazo cyagombye kubaho.

Ati “Urwaye ararwaye birumvikana ariko hari ibyangombwa byose kugira ngo tumwiteho.”

Kuba ari ubwa mbere umubare w’abarwayi ba COVID-19 wiyongereye cyane mu Rwanda ku munsi, Minisitiri w’Ubuzima, Dr Ngamije avuga ko mu barwayi 17 basanganwe icyo cyorezo ntawe bigeze banduza kuko bashyizwe hamwe mbere nta muntu barahura na we.

Yagize ati “Aba ntabwo bahuye n’abantu kubera ko twahise tubafata ku kibuga cy’indege tubajyana ahantu hatunganyijwe kugira ngo bakurikiranwe, nta muntu bari bagahuye nawe yaba uwo mu miryango yabo cyangwa mu nshuti, iki nacyo ni ikindi cyemezo cyiza kuko cyatumye tubasuzuma batarahura n’abandi ngo bandure.”

Leta y’u Rwanda yakajije ingamba nyuma y’uko umubare w’abanduye ukomeje kwiyongera, ndetse ku wa Gatandatu Minisitiri w’Intebe yatangaje ko byagaragaye ko hakwiye kongera imbaraga mu gukumira ikwirakwira rya COVID-19 mu Rwanda, ku buryo ingamba zakajijwe mu gihe cy’ibyumweru bibiri ndetse bishobora kongerwa.

Mu myanzuro yatangiye kubahirizwa uhereye ku wa Gatandatu 23:59, irimo ko ingendo zitari ngombwa zibujijwe.

Iryo tangazo rivuga ko “Gusohoka mu rugo nta mpamvu zihutirwa birabujijwe, keretse abajya gutanga no gushaka serivisi z’ingenzi harimo kwivuza, guhaha, serivizi za banki n’izindi.”

Minisiteri y’Ubuzima yasabye abaturarwanda bose gukomeza kwitwararika no gukurikiza ingamba zashyizweho na Leta zirimo;

- Guhagarika ubucuruzi bw’ibikorwa bitari iby’ibanze,

- Guhagarika ingendo zihuza imijyi n’uturere n’izindi zitari ngombwa no kuva mu rugo nta mpamvu zihutirwa,

- Abantu bose bageze mu Rwanda mu byumweru bibiri bishize barasabwa kwishyira mu kato mu gihe cy’iminsi 14 guhera igihe bagereye mu Rwanda.

- Kubahiriza amabwiriza y’inzego z’ubuzima yo gukaraba intoki kenshi kandi neza no kubahiriza intera ya metero imwe hagati y’abantu.

COVID-19 yemejwe nk’icyorezo cyibasiye Isi yose. Kuva cyaboneka bwa mbere mu Bushinwa, aho cyatangiriye mu Mujyi wa Wuhan mu Ukuboza 2019, abamaze kucyandura basaga 378 000, abarenga 16 000 bahitanywe na cyo mu gihe 101 600 bagikize.

Ibimenyetso bya COVID-19 birimo kugira umuriro, ibicurane, umunaniro n’inkorora ijyana no kubabara mu mihogo, guhumeka bigoranye bishobora kugera aho bitera umusonga nawo ushobora kubyara urupfu.

Gishobora kwandura binyuze mu kuramukanya abantu bahana ibiganza, hakabaho guhererekanya amatembabuzi yaturutse mu myanya y’ubuhumekero y’umuntu wanduye, maze uyakozeho akaza kwikora ku munwa, ku mazuru cyangwa mu maso, agahita yandura. Umuntu ashobora no gukura iyi virusi ku kintu yaguyeho, kandi iyo gikomeye ishobora kumaraho amasaha menshi yagera no ku minsi itatu.

Minisante itanga inama ko umuntu ugaragaje ibimenyetso bya COVID-19 yakwihutira guhamagara umurongo utishyurwa wa 114, agahabwa ubufasha adahise akora urugendo, kwipimisha akoresheje telefoni akanda *114# agakurikiza amabwiriza, kohereza email kuri callcenter@rbc.gov.rw, gutanga ubutumwa bwa WhatsApp kuri +25088202080 cyangwa akitabaza umujyanama w’ubuzima umwegereye.

Ku rwego rw’Isi imibare igaragaza ko abantu barenga ibihumbi 380 bamaze kwandura Coronavirus mu gihe abandi barenga ibihumbi 16 kimaze kubahitana, u Butaliyani bukaba aribwo bukomeje kwibasirwa cyane kuko barenga ibihumbi bitandatu.Ikigo nderabuzima cya Kanyinya niho abarwaye icyorezo cya Coronavirus barimo kwitabwaho bari

Siga igitekerezo

This site uses Akismet to reduce spam. Learn how your comment data is processed.

%d bloggers like this: