Ku banyeshuri bo mu mashuri abanza, Kuva kuri uyu wa Kabiri barakurikira amasomo kuri Radio Rwanda

Muri iyi minsi Isi yugarijwe n’icyorezo cya Coronavirus abantu bose bari mu ngo zabo mu kwirinda ikwirakwira ry’iki cyorezo. Abanyeshuri ni bamwe mu bagizweho ingaruka n’iki cyorezo aho benshi muri bo babuze uko biyungura ubumenyi nyuma y’uko amashuri afunze. Kuri ubu abiga mu mashuri abanza mu Rwanda bahawe inkuru nziza.

Ikigo cy’Igihugu gishinzwe Uburezi mu Rwanda (REB) cyatangaje ko kuva kuri uyu wa Kabiri tariki 14/04/2020 abanyeshuri biga mu mashuri abanza (Primaire) batangira gukurikira amasomo anyuranye kuri Radio Rwanda y’Ikigo cy’Igihugu cy’Itangazamakuru (RBA). REB yatangaje ko mu minsi micye hazatangazwa andi maradiyo yateye inkunga iyi gahunda.

Nk’uko REB yabitangaje mu itangazo yanyujije kuri Twitter, abanyeshuri babanza kwiga ni abo mu mwaka wa Mbere w’amashuri abanza (P.1) bakaba batangirira ku isomo ry’Ikinyarwanda kuva saa Mbiri n’igice za mu gitondo (8h:30 Am), kugeza saa Mbiri n’iminota mirongo itanu (8h: 50), ibisobanuye ko bari bwige iminota 20 ndetse akaba ari na ko bimeze kuri buri somo ryose rizigishwa muri iyi gahunda nshya.

Rwanda is supplying computers to all primary schools as a tool to facilitate their learning, an investment seen as a foundation for Rwanda’s future. Some pupils have already become basic programmers. Photo:Claude Ntawitonda (PRNewsFoto/KT Press)

Abanyeshuri bo mu mwaka wa Gatandatu (P.6) ni bo baheruka kuri iyi gahunda. Kuri uyu wa Kabiri bariga ‘Science’ kuva saa Munani n’iminota 40. Buri shuri rizajya rimara kwiga hakurikireho irindi ako kanya nta n’umunota umwe unyuzemo. Ahantu hari akaruhuko gusa ni ukuva saa Tatu n’iminora 10 kugeza saa Munani z’amanywa zuzuye ndetse na nyuma ya saa Cyenda zuzuye ari nabwo gahunda y’umunsi yo kwiga izajya irangira.

REB yahamagariye abanyeshuri bose biga muri ‘Primaire’ kudacikwa n’aya mahirwe yo gukurikira amasomo bibereye iwabo mu rugo muri iki gihe abantu bose baru mu ngo zabo muri gahunda ya ‘Guma Mu Rugo’ mu kwirinda Coronavirus. REB iti “Banyeshuri, mufate umwanya mukurikire gahunda yo kwigira kuri Radiyo muri bukurikire kuri RBA,…Ntimucikwe n’amasomo” Iyi gahunda ije nyuma y’uko abanyeshuri biga mu mashuri yisumbuye na kaminuza bo bakurikira amasomo kuri murandasi.

Uko gahunda yo kwiga iteye ku banyeshuri biga muri ‘Primaire’

Siga igitekerezo

This site uses Akismet to reduce spam. Learn how your comment data is processed.

%d bloggers like this: