January 30, 2023

Ibyo wamenya kuri Matata Joseph, umuhezanguni utegekwa n’inda!

Umusaza w’imyaka 70 Joseph Matata amaze iminsi yarasizoye ku mizindaro ya YouTube yegamiye ku mitwe y’iterabwoba yiyita ko irwanya ubuyobozi bw’u Rwanda.

Uyu musaza yumvikana kuri iyo mizindaro ateshaguzwa ari nako avuga amahomvu n’ibinyoma bitagira uko bingana asebya u Rwanda n’ubuyobozi bwarwo anakwirakwiza ingengabitekerezo ya Jenoside.

Uyu musaza wataye umutwe mu Bubiligi ndetse ni umuyobozi w’umushinga bise “Centre to Fight Impunity and Injustice in Rwanda (CLIIR)” yashinze mu 1995 mu rwego rwo gutekera imitwe abazungu batazi ibye.

Intego nyamukuru ya CLIIR ni ukuzamura no kumenyekanisha icengezamatwara ry’abahezanguni rivuga ko mu Rwanda habayeho Jenoside ebyiri mu gihe nyamara bizwi neza ko habayeho gusa Jenoside yakorewe Abatutsi.

Matata n’ikiryabarezi cye bafite intego nyamukuru yo gutagatifuza abagize uruhare muri Jenoside bashakishwa n’ubutabera.

Si ibyo gusa kandi kuko uyu musaza yagiye akora ibigega bya baringa bihamagarira interahamwe n’ibigarasha gukusanya amafaranga ayita ko agenewe abo yitaga ko barengana mu Rwanda ariko ayo yose byarangiraga ayiririye.

Matata akomoka k’ Umunyekongo wakoraga mu birombe byacukuraga gasegereti i Rwinkwavu mu Karere ka Kayonza, na nyina w’umunyarwandakazi.

Yabanje gukora muri BNR, avuye kwiga mu cyahoze ari COK (College Officiel de Kigali, i Mburabuturo).

Akiri umunyeshuri Matata yajyaga aririmba n’ubwo abamwumvaga bose bamwinubaga bitewe n’uko batanyurwaga n’ibyo aririmba – indirimbo yatumye azinukwa burundu kuririmba ni iyitwa “Nzasara” yaririmbiye muri ‘Culturel y’Abafaransa’.

Muri iyo ndirimbo Matata yarateraga ngo “Ndagukunda cyane” maze umugore bayifatanyaga akikiriza avuga ngo “Nzasara!” mu gihe ari kuvuga ibyo Matata akaba yigondagonda ku rubyiniro; ibintu byatumye abari muri salle babaha induru bati “ahubwo ni Matata wasaze!”

Ku rundi ruhande iyo urebye amagambo Matata ubu aba avuga byerekana ko uyu musaza bya bisazi cyera bajyaga bamwitirira byaba byaragarutse kuko imvugo ze zigaragariza buri wese ko adakomeye mu mutwe.

Nyuma ya 1994, Matata yari azi ko azabona umwanya mu buyobozi, ntibyagenda uko, kuko abifuje imyanya cyangwa ibihembo ko batagiye mu bwicanyi siko babibonye bose, kandi siko babaye abarakare.

Matata rero, kimwe n’abandi batabashije kwihanganira ubukene bwa nyuma ya jenoside, yafashe inzira ijya mu Bubiligi, agezeyo ati ‘ndi umuntu w’uburenganzira bwa kiremwamuntu uhunze’.

Hari ikintu Matata abantu batazamwibagirwaho, uretse kuba iriya CLIIR anyuzamo ibyo bitekerezo, asabishamo n’amafaranga. Uyu musaza usaziye ubusa yigeze gutanga ubuhamya i Arusha bwo gushinjura abajenosideri, ariko ubuhamya bwe bwafashe nko kurangaza abantu.

Akenshi abantu nk’aba iyo bari ku mizindaro y’ibigarasha n’interahamwe baba bazi ko ntawe ubazi ariko baba bibeshya cyane, kuko nta narimwe bazigera babeshya abanyarwanda ngo bikunde.

 Mugenzi Félix

Leave a Reply

%d bloggers like this: