06-12-2023

Ntibikwiye ko abajenosideri bakomeza gupfa umusubirizo batagejejwe imbere y’ubutabera

0

Mu ntera y’iminsi irindwi gusa Abanyarwanda by’umwihariko abarokotse Jenoside yakorewe Abatutsi bakiriye inkuru ncamugongo ko Mpiranya Protais na Munyarugarama Pheneas abajenosideri ruharwa bari ku rutonde rw’abahirwa n’isi yose, bapfuye “kera” cyane.

Urwego rwasigariyeho Inkiko Mpuzamahanga Mpanabyaha (IRMCT) ni rwo rwemeje imfu z’izi nkoramaraso, uru rwego rwatangaje ko Mpiranya yapfuye tariki ya 5 Ukwakira 2006 mu gihe Munyarugarama we yapfuye mu mwaka wa 2002.

Usibye kuba Mpiranya na Munyarugarama bahuriye ku kuba bari barashyiriweho impapuro zibata muri yombi, bombi bahuriye no ku kuba barapfuye batagejejwe imbere y’ ubutabera ngo baryozwe ibyo bakoze.

Ni  mu gihe kandi ibihugu bitandukanye bikomeje gukingira ikibaba bagenzi babo bagishakishwa nka Kayishema Fulgence, Sikubwabo Charles, Ryandikayo Charles na Ndimbati Aloys.

Ku rundi ruhande, komisiyo yashyizweho na Leta y’u Rwanda ishinzwe gushaka abajenosideri batorotse ubutabera bw’u Rwanda iherutse gutangaza ko abajenosideri bagera mu 1100 bakihishe mu bihugu bitandukanye harimo iby’abaturanyi, iby’uburayi, Amerika, Aziya ndetse na Australia.

Bigaragara kandi ko n’imanza za bamwe nka Kabuga Felicien zigenda gahoro cyane by’umwihariko nk’uru rubanza rwirengagizwa kuva aho rwatangiriye aho hari impungenge ko Kabuga ashobora kuzapfa atarakatirwa mu gihe nyamara ari we wateye inkunga y’amafaranga abajenosideri.

Bavugako “ubutabera butinze buba bwimanywe”, iri setabirenge ry’ubutabera bwa bano bajenosideri batangiye gupfa bitwa ko ari “abere” kubera kutagezwa imbere y’ ubutabera; ni igikomere ku barokotse Jenoside yakorewe Abatutsi.

Ibi kandi biha urwaho bamwe mu bajenosideri n’abatamitswe urwango rwabo babyuririraho bagapfobya Jenoside nyirizina, bikaba bikwiye ko umuryango mpuzamahanga ukora igikwiye maze buri mujenosideri watorotse akaryozwa uruhare rwe.

Jenoside ntizongera kubaho ukundi, Never again!

Mutijima Vincent

About Author

Leave a Reply

%d