December 7, 2022

Amashyi menshi ku Nzego z’Umutekano z’u Rwanda ku kugarura amahoro n’ituze muri Cabo Delgado!

Byasabye amezi macye cyane inzego z’umutekano z’u Rwanda (Ingabo na Polisi)  kugira ngo zisubize ibintu mu buryo muri Cabo Delgado, intara yo muri Mozambique ikubye inshuro eshatu mu bunini u Rwanda.

Iyi ntara yari imaze imyaka ine mu maboko y’ibyihebe byo mu mutwe wa “Al Sunnah wa Jama’ah” aho ubuzima bwari bwarahagaze cyane ko ibi byihebe byishe abaturage barenga 3000, abarenga ibihumbi 800 bavanwe mu byabo mu gihe ibikorwaremezo byose byangijwe ku buryo bukomeye.

Nyuma y’umwaka Inzego z’Umutekano z’u Rwanda ku bufatanye n’iza Mozambique zitangiye kurwanya ibyo byihebe, zabashije kwigarurira byinshi  mu bice bitandukanye bya Cabo Delgado byari bimaze igihe kinini bigenzurwa na biriya byihebe.

Ibihumbi birenga 130,000 by’abaturage bimaze kugaruka mu byabo aho bose intero n’inyikirizo ari ugushima Inzego z’Umutekano z’u Rwanda ku bwitange n’umurava zigaragaza mu kazi kazi ka buri munsi.

Magingo aya izi nzego zishinzwe umutekano zimaze kwigarurira uduce twishi twa Cabo Delgaldo nka Palma, Quionga, Tete, Zambia, Maputo, Nhica Do Rovuma, Quelimane, Njama Awasse, Chinda na Mumu, ndetse n’ibikorwa remezo birimo ikibuga cy’indege cya Afungi giherereye mu Mujyi wa Mocimboa da Praia wari ibirindiro bikuru y’ibyihebe.

Nyuma y’imyaka irenga ine abaturage ba Cabo Delgado Mozambique baratakaje icyizere cy’ubuzima bongeye kumwenyura kubera amahoro n’ittuze byagaruwe n’izi nzego z’umutekano;  ubu abaturage barahaha, baratembera mu mahoro, amashuri nayo yarafunguwe mu ntangiriro z’uyu mwaka.

Mu gihe abaturage ba Cabo Delgado bashima cyane Inzego z’Umutekano z’u Rwanda ku bwo kubagarurira amahoro, nta warenza ingohe umugaba w’ikirenga wazo ari na we Perezida wa Repubulika, Nyakubahwa Paul Kagame cyane ko ari we utanga imirongo migari ngenderwaho.

N’ikimenyimenyi, Perezida Kagame muri Nzeri umwaka ushize yasuye izi nzego z’umutekano maze azishimira ubwitange n’umurava zagaragaje mu kubohora Cabo Delgado.

Ingabo n’abapolisi b’u Rwanda kandi bagiye bagaragara mu bikorwa byo gufatanya n’abaturage ba Mozambique harimo gukora umuganda rusange, gusukura ahantu hatadukanye, imikino ya gicuti n’ibindi byinshi bishimangira ko koko amahoro n’ituze byagarutse muri Cabo Delgado.

Ingabo n’Abapolisi b’u Rwanda bifatanya n’abaturage ba Mozambique mu gikorwa cy’Umuganda

Izi ntwali zacu zikomereze aho kandi ntizikure mu rujye cyane ko Abanyarwanda twese tuziri inyuma mu byo zikora byose mu rwego rwo kubaka u Rwanda na Afurika twifuza.

Karemera Jean Luc

Leave a Reply

%d bloggers like this: