December 7, 2022

Kwirinda ikigare n’ingeso mbi mu bizafasha urubyiruko kubaka ahazaza hatajegajega


Mu myaka 28 ishize urubyiruko rw’u Rwanda rwahawe imbaraga rurashyigikirwa mu bikorwa byose, gushyigikira urubyiruko byakozwe kuva ku rwego rwo hasi aho kujyana umwana ku ishuri ari itegeko hatitawe ko ari umuhungu cyangwa umukobwa.


Bitandukanye na mbere aho umwana wazaga imbere kuba yajyanwa mu ishuri yagombaga kuba umuhungu.


Leta y’ubumwe irangajwe imbere na Perezida Paul Kagame, yafashe icyemezo cyiza cyo kuzana urubyiruko ngo nabo batange umusanzu wabo mu kubaka igihugu.

Iki cyemezo cyakiriwe neza n’urubyiruko ndetse bakunze kubigarukaho cyane bashimira umutoza w’ikirenga.
Urubyiruko ubu bahawe umwanya mu nzego zifata ibyemezo ndetse barahagarariwe kuva ku rwego rw’umudugudu.

Iyi ni intambwe nziza leta yateye ndetse barebye kure kuko umubare munini w’Abanyarwanda ni urubyiruko, hari hakenewe ko nabo bashyirwa mu ngamba bagafatanya n’abandi mu rugendo rwo kubaka igihugu.


Nubwo bwose urubyiruko rwashyizwe imbere, ntibagakwiye gukoresha umwanya n’ikizere bagiriwe n’igihugu mu kwishora mu ngeso mbi zirimo ikibazo cy’ubusinzi kimaze kuba icyorezo mu rubyiruko.
Gukoresha ibiyobyabwenge mu rubyiruko ni ikibazo urubyiruko bose bagomba guhagurukira mu kurwanya kuko ntaho biteze kubageza.

U Rwanda nk’igihugu kiri mu nzira y’amajyambere gikeneye urubyiruko by’umwihariko rufite intego ndetse rureba kure.


Kunywa inzoga, amatabi n’ibindi biyobyabwenge, nta hantu byenda kugeza urubyiruko kuko akenshi birangira banishoye mu yindi mico itari myiza irimo ubusambanyi, ubujura n’indi.


Urugamba rw’amasasu rwararangiye ubu igihugu kiri ku rugamba rw’iterambere. Uru ni urugamba buri munyarwanda wese akwiye kugiramo uruhare byagera ku rubyiruko bo nk’amizero y’igihugu bikaba akarusho.

Ibi ntabwo bazabigeraho birirwa mu businzi ndetse n’izindi ngeso mbi.
Urubyiruko bakeneye kwirinda ibigare, ndetse n’ibindi byose bituma biyicira ejo habo ndetse n’ah’igihugu muri rusange.


Kuba igihugu cyarafunguriye imiryango urubyiruko ku buryo aho bakomanze hose binjira, igihugu giteze amatwi urubyiruko kikaba kiniteguye kubafasha no kubatera inkunga mu buryo bwose bushoboka, urubyiruko ntirwakabaye rubifata uko rwiboneye ndetse ngo runabiteshe agaciro.


Kugira igihugu gishyigikiye urubyiruko ni amahirwe aboneka hacye kuri iyi Si, byaba bibabje kuba urubyiruko rw’uyu munsi baba aribo bakoresha nabi ayo mahirwe.


Urubyiruko bakwiye kujya bazirikana ko aribo bazakorera mu ngata ababagiriye ikizere bakabashyiriraho gahunda zo kubateza imbere, ibi byazakomeza bikaba indoto mu gihe ntacyo urubyiruko rukoze ngo bace ukubiri n’ingeso mbi zibugarije muri iki gihe.


Ikindi ni uko urubyiruko rugomba gukomeza kuzirikana ko ejo heza bifuza hategurwa uyu munsi; ibi byose bikwiye kubatera imbaraga zo gukomeza kwirinda, gushishikarira gukora ibyiza ndetse no gutanga umusanzu wabo mu kubaka igihugu batizigamye.


Inama Madame Jeannette Kagame aherutse kugira urubyiruko mu nyandiko ye “Agahinda tutavuga: Ibaruwa Igenewe

Urubyiruko Rwacu’’ baramutse bazikurikije zabafasha kuba urubyiruko igihugu cyifuza.
Rubyiruko bagenzi banjye, igihugu cyacu kidukunda gikomeje gukora ibishoboka byose ngo dutere imbere, ni ahacu ho kutazakibera abana gito.


Muvunyi Blaise

Ibikubiye muri iyi nyandiko ni ibitekerezo by’umwanditsi. Muvunyi Blaise ni umusore wavutse nyuma ya Jenoside yakorewe Abatutsi unezezwa n’umwanya urubyiruko rwahawe ngo rufatanye n’abandi mu rugamba rwo guteza imbere u Rwanda rwacu.

Leave a Reply

%d bloggers like this: