UEFA Europa League: Arsenal yasezerewe, Man United ikatisha itike
Abakunzi ba Arsenal (Visit Rwanda) bari mu kababaro nyuma y’uko mu ijoro ryo kuri uyu wa Kane tariki ya 16 Werurwe 2023, ikipe yabo isezerewe kuri penaliti 5 – 3 na Sporting CP yo muri Portugal mu marushwa ya UEFA Europa League.
Ni umukino Arsenal yari yakiriye aho amakipe yombi yabanje kunganya igitego 1 -1, Arsenal ni yo yabanje igitego cyatsinzwe na Granit Xhaka ku munota wa 19, byatumye igice cya mbere kirangira Arsenal iri imbere.
Igice cya kabiri cyatangiye amakipe yombi asatirana cyane, ku munota wa 62 nibwo Pedro Goncalves yinjije igitego cya Sporting CP.
Iminota 90 yarangiye amakipe yombi anganya hongerwaho indi minota 30 bikomeza kumera gutyo biba ngombwa ko hitabazwa za penaliti; Arsenal yinjije 3 inanirwa 1 mu gihe Sporting CP yo yinjije zose ihita ikatisha itike ya kimwe cya kane cy’irangiza.
Ku rundi ruhande, Manchester United nayo yabashije kugera muri kimwe cya kane nyuma yo gutsinda igitego 1-0 Real Betis mu mukino wabereye muri Espagne.
Tombora y’uko amakipe azahura muri kimwe cya kane cy’irangiza irakorwa kuri wa Gatanu tariki ya 17 Werurwe 2023.
Karemera Jean Luc
About Author
