Rudasingwa Théogene wamenyekanye nka “RedCom” nk’izina yakoresheje igihe kinini mu butekamutwe n’ubwambuzi bushukana, yanywanye n’interahamwe none ageze aho ahakana Jenoside yakorewe Abatutsi k’umugaragaro.
Mu kiganiro uyu mutekamutwe yakoreye k’umuzindaro rutwitsi ‘Radiyo Ishakwe’ bise “Twibuke Twinegura,’’ mu matakaragasi ahorana mu kanwa, Rudasingwa yongeye gufindafinda ibinyoma agamije gushimisha interahamwe, dore ko arizo akuraho amaramuko. Yagize ati: “Jenoside yakorewe abahutu yabayeho ikozwe na FPR, ndetse Jenoside yakorewe Abatutsi yatewe n’ihanurwa ry’indege ya Habyarimana “Kinani.’’
Rudasingwa “RedCom’’ igisambo rurangiranwa asigaranye intwaro imwe yo gucuruza ikinyoma mu nterahamwe. Ibintu akora kugirango azishimishe mu mugambi wazo wo guhimba amateka apfobya Jenoside yakorewe Abatutsi. Iyo Rudasingwa abikora yirengagiza nkana ukuri kw’amateka, ibintu bishengura abarokotse Jenoside nyirizina.
Rudasingwa yabayeho ubuzima bwe bwose atunzwe n’ibinyoma n’amanyanga kugeza aho mu mwaka wa 2020, yakoze ibidakorwa, maze agishyira umukono ku ibaruwa yanditswe n’agatsiko k’urubyiruko rukomoka ku basize bakoze Jenoside yakorewe Abatutsi kazwi nka “Jambo ASBL”. Iyi baruwa yasabaga Perezida Emmanuel Macron kwisubiraho ku cyemezo yari yatangaje ko abajenosideri bihishe mu Bufaransa bagomba kugezwa imbere y’ubutabera.
Amashirakinyoma avugako, yari amatakirangoyi kugirango akingire ikibaba umucurabwenge wa Jenoside yakorewe Abatutsi, Agathe Kanziga, akaba n’incoreke ye.
Kuba rero akomeje kujya mu mizindaro rutwitsi avuza induru agamije guhakana Jenoside yakorewe Abatutsi bigaragaza neza inywana rye n’ Interahamwe, ndetse ko ntacyo atakora ngo abone udufaranga tw’inticantikize.
Ibi kandi binashimangirwa no kuba yihandagaza akabeshya ku bijyanye n’ ihanurwa ry’ indege ryakozwe n’abahezanguni bo muri leta yateguye Jenoside, nk’ ikimenyetso cyateye Jenoside. Nyamara ibimenyetso bihagije bihari biragazako Jenoside yakorewe Abatutsi ari umugambi watangiye kuva muri 1959.
Ubusahiranda bw’iki kigwari ntibuzamuhira kuko iminsi y’igisambo ntijya irenga mirongo ine.
Umulisa Carol