Abanyakenya bihariye ibihembo hafi ya byose muri ‘Kigali International Peace Marathon 2023’ – AMAFOTO

Kuri iki Cyumweru tariki ya 11 Kamena 2023, nibwo irushanwa Mpuzamahanga ry’abasiganwa ku maguru rigamije kwimakaza amahoro binyuze mu mikino (Kigali Peace Marathon) ryasozwaga.

Abanya Kenya nibo bihariye imyanya 8 yose, haba muri Full Marathon ndetse n’igice cya Marathon mu bagabo.

Umunya Kenya George Onyancha niwe wegukanye isiganwa rya Marato (Full Marathon) mu bagabo, ndeste undi Munyakenya Kipyeko Kennedy yegukana igice cya Marathon (half Marathon).

Mu bagore Umunya-Ethiopia Muluhebt Stega niwe wegukanye Marathon yose (Full Marathon), naho Moseti Winfrindah Moraa w’Umunyakenya yegukana igice cya Marathon (Half Marathon).

Umunyarwanda waje ku mwanya wo hafi ni Marthe Yankurije waje ku mwanya wa 7 mu igice cya Marathon mu bagore.

Muri aya masiganwa umukinnyi wabaye uwa mbere muri marathon mu bagabo n’abagore yahawe ibihumbi 20$ asaga miliyoni 22 Frw naho uwa kabiri abona 15$, ndetse uwa gatatu abona 7500$, mu gihe mu mwaka ushize, abayegukanye bahawe ibihumbi 4$, kandi uyu mwaka abantu 8 ba mbere muri buri cyiciro bahembwe.