Rayon Day: “Gikundiro” yongeye gutsindirwa imbere y’ibihumbi by’abakunzi bayo!
Ikipe Rayon sports bakunze kwita Gikundiro kuri uyu wa Gatandatu tariki ya Gatanu Kanama 2023 yatsinzwe na Kenya Police FC yo muri Kenya mu mukino wa gicuti wabereye kuri Kigali Pelé Stadium.
Ni umukino wahuriranye n’ibirori ngarukamwaka byizihirizwaho umunsi wahariwe Rayon Sports bizwi nka ‘Rayon Day’.
Uwo mukino wabanjirijwe n’ibirori byo kwerekana abakinnyi Rayon sports izakoresha mu mwaka w’imikino wa 2023/24 uzatangira muri uku kwezi ndeste n’imikino ya CAF Confederation cup.
Umutoza wa Rayon sports Yamen Zelfani yari yabanjemo abakinnyi barimo Hategekimana Bonheur, Tuyisenge Arsène, Mitima Isaac, Serumogo Ali, Rwatubyaye Abdul, Aruna Moussa Madjaliwa, Youssef Rharb, Ngendahimana Eric, Ndekwe Félix, Joackiam Ojera na Charles Bbaale.
Amakipe yombi yatangiye umukino asatirana, gusa ikipe ya Kenya Police FC niyo yagerageje gutera imipira myinshi mu izamu rya Hatagekimana Bonheur ariko ababera ibamba.
Kenya Police FC yabonye igitego ku munota wa 47 igitego cyatsinzwe na Kenneth Muguna ku mupira wari wakuwemo n’umuzamu wa Rayon sports Hategekimana Bonheur.
Rayon sports imaze gutsindwa inshuro ya gatatu ku munsi wayo wa Rayon Day, yaherukaga gutsindwa na Kiyovu Sports kuri uyu munsi wizihijwe umwaka ushize.
Rayon sports izongera gukina umukino na Mukeba APR FC ku gikombe cya Super Cup kizakinwa ku Cyumweru gitaha tariki ya 13 Kanama 2023.
Karemera Jean Luc
About Author
