Rayon Sports yanyagiye APR FC, iyitwara igikombe cya Super Cup

Ikipe ya Rayon Sports kuri uyu wa Gatandatu tariki ya 12 Kanama 2023 yanyagiye mukeba wayo w’ibihe byose, APR FC ibitego 3 – 0 inegukana igikombe cya ‘Super Cup’ mu mukino wabereye kuri Kigali Pele Stadium.

Kiriya gikombe gikinwa buri mwaka n’ikipe yatwaye shampiyona aho ihura n’iyegukanye igikombe cy’amahoro.

Umutoza wa APR, Thierry Froge yabanjemo abakinnyi barimo Pavelh Ndzila, Omborenga Fitina, Ishimwe Christian, Nshimiyimana Yunussu, Buregeya Prince, Nshimiyimana Ismael Pitchou, Ruboneka Jean Bosco, Apam Bemol, Niyibizi Ramadhan ,Shaiboub Ali, Victor Mbaoma.

Naho kuri Rayon Sports umutoza Yamen Zalfani yabanjemo Hategekimana Bonheur, Serumogo Ali, Ganijuru Elie, Mitima Isaac, Rwatubyaye Abdul, Ngendahimana Eric, Kanamugire Roger, Youssef Rharb, Charles Bbaale, Luvumbu Nzinga Heritier, Joackiam Ojera.

Rayon Sports niyo yafuguye amazamu mu minota ya mbere, umukinnyi mushya wayo ukomoka muri Uganda Charles Mbale, nyuma y’umupira w’umuterekano wahiduwe na Heritier Luvumbu kumunota wa 6. APR yakomeje guhusha ibitego byinshi harimo n’igitego cyaraswe na Apam Bemol ari wenyine n’izamu.

Mu gice cya kabiri APR FC yagerageje kotsa igitutu Rayon ariko biba iby’ubusa, Rayon Sports yongera kubona ibitego bibiri kuri penaliti zatsinzwe na Kalisa Rachid ndetse na Joackiam Ojera.

Rayon Sports imaze gutsinda imikino itatu yose yikurikirana mu mikino ihuza amakipe yombi irimo n’uw’Igikombe cy’Amahoro ndetse na Shampiyona.

Rayon sports ni yo kandi yatsinze ubwo amakipe yombi aheruka guhurira kuri Super Cup mu 2017, mu mukino warangiye ari ibitego 2-0 byatsindiwe i Rubavu, ariko iminota 27 ya nyuma igakinirwa i Nyamirambo. APR FC iheruka gutwara Super Cup mu 2018 itsinze Mukura VS.