Ikihebe Musabyimana mu kuvanga amasaka n’amasakaramentu!

Musabyimana Gaspard, uri ku rutonde rw’abantu 25 u Rwanda ruherutse gushyira ku rutonde rw’ibyihebe bishakishwa, yongeye gushimangira ubujiji bwe agereranya ibitagereranywa.

‎Uyu musaza utunzwe no kuvuga ubusa yabitangarije ku muzindaro rutwitsi wa YouTube asanzwe akoresha ngo asige icyasha ubuyobozi bw’u Rwanda ari nako aba nyiramubande w’interahamwe.

‎Mu kugereranya ibitagereranywa uyu musaza usaziye mu mateshwa yagereranyije Perezida Kagame n’umunyagitugu Idi Amin Dada wayoboye Uganda.

‎Iyi nterahamwe kabombo yiyemeje kwirirwa isebanya ntikwiye kugira uwo iyobya kubera ko birazwi ko Idi Amin Dada u Rwanda rwagize yari Habyarimana Juvenal “Kinani” we yirirwa avugira, ashimagiza anashyigikira politiki ya parmehutu yagejeje u Rwanda mu icuraburindi.

‎Kinani yayoboye u Rwanda nabi, ashyigikira kandi anubaka politike zicamo Abanyarwanda ibice mu ngeri zose, higishwa ko umututsi ari “umuntu mubi”, hagamijwe kwicwa Abatutsi bakamarwa burundu.

‎Ku butegetsi bwa Habyarimana Abatutsi barahunze kubera gutotezwa no gutwikirwa inzu bakerekeza mu bihugu by’abaturanyi, bambuwe uburenganzira bwose ku mitungo yabo ndetse no kugaruka mu gihugu cyababyaye.

‎Ni kenshi Abanyarwanda bari barameneshejwe bagiye basaba gutaha mu gihugu cyabo ku neza, Habyarimana akababera ibamba kugeza n’ubwo yaje kuvuga ko igihugu cyamaze kuzura bo batabona aho bajya.

‎Habyarimana ubwe yivugiye ko ‘u Rwanda ari nk’ikirahure cyuzuye amazi’ utakongeramo andi kuko yameneka. Ubwo bugome bwe bwaje no kwemezwa na komite nyobozi ya MRND.

‎Ikindi gikomeye kandi ni uko ubutegetsi bwa Habyarimana bwateguye Jenoside yakorewe Abatutsi, itoza interahamwe, ikwirakwiza icengezamatwara rigamije kwanga Abatutsi, ibyo byose mu mugambi wo kubamaraho bose.

‎Umunyagitugu kinani yikubiye ubukire we n’abo bari bahuje umugambi wo kurimbura Abatutsi, nta muntu wakoraga ku butunzi bw’igihugu atari bo gusa.

‎Perezida Kagame, ku rundi ruhande, yasanze igihugu cyangiritse maze agisubiza ku murongo, we na FPR-Inkotanyi bahagarika Jenoside yakorerwaga Abatutsi mu 1994.

Perezida kandi yasubije u Rwanda ku ikarita y’isi, yubaka ubumwe bw’abanyarwanda, ahamya ububanyi n’amahanga, yubaka umutekano uhamye ndetse n’ibindi byinshi none ubu u Rwanda ni intangarugero ku ruhando mpuzamahanga, ikintu kibabaza cyane izo nterahamwe nka Musabyimana.

Uko Musabyimana n’izindi nterahamwe ndetse n’ibigarasha bashaka kugoreka amateka no gushaka gusiga icyasha abasubije u Rwanda ubuzima , byose bizahora bibapfira ubusa, barivunira ubusa!
‎
‎Mukobwajana Linda