Bamwe mu bajenosideri bakidegembya mu Bwongereza basabiwe koherezwa mu Rwanda

Umudepite mu nteko Nshingamategeko y’Ubwongereza, Stuart Polak, yasabye ko abagize uruhare muri Jenoside yakorewe Abatutsi mu 1994 bakomeje kwidegembya mu gihugu cye, boherezwa kuburanishwa mu Rwanda.

Mu ntangiriro z’icyumweru kirangiye ni bwo Polak yagaragaje iki kibazo aho yahishuye ko mu Bwongereza hari abajenosideri bagera kuri batanu barimo Vincent Bajinya, Célestin Ugirashebuja, Charles Munyaneza, Emmanuel Nteziryayo na Célestin Mutabaruka, aba bakaba bakomeje kwidegembya “kandi bahabwa n’Ubwongereza ibyo bekeneye byose”.

Aba abajenosideri batanu bavuzwe na Polak birirwa bakwirakwiza ibinyoma bakanagoreka amateka ya Jenoside yakorewe Abatutsi mu rwego rwo kwigira abere, ibyaha byabo bikaba bitizwa umurindi na raporo zimwe zivuga ko niboherezwa mu Rwanda ubuzima bwabo buzaba buri mu kaga.

Gusa Polak yakuyeho urujijo abwira abo bari kumwe mu nteko ko hashize imyka 10 u Rwanda rukuyeho igihano cy’urupfu bityo ko nta gikwiye kubuza Ubwongereza kohereza bariya bajenosideri kuburunishirizwa mu Rwanda.

Ati “Kuba abatari munsi ya batanu bose bakoze Jenoside baba mu Bwongereza kandi bakaba babayeho neza, babona buri kimwe cyose ntibikwiye cyane ko Ubufaransa n’Ububirigi n’ibindi bihugu byohereje abarezwe kuburanishwa mu Rwanda.”

Umushakashatsi kuri Jenoside Tom Ndahiro yishimiye intera Polak yateye, akaba agira ati “Ni ngombwa ko mwene aba bajenosideri batabona ubuhungiro iteka hejuru y’ibinyoma byabo.”

Yakomeje agira ati “Abantu ntibagomba kwibagirwa ko mwene abo bajenosideri bahora bakoresha iturufu yo gusakaza ingengabitekerezo ya Jenoside.”

Ni ibintu bizwi ko abajenosideri cyangwa se ababashyigikira bahora bateza imbere ibikorwa byabo biciye mubyo bita ibikorwa by’ubukorerabushake biyita ko baharanira uburenganzira bw’Ikiremwamuntu.

Bijandika mu guhakana no gupfobya Jenoside, bakoresha inyito ko “habayeho Jenoside ebyiri”, ibi byose bakabikora mu gihe babeshwaho n’misoro y’Ubwongereza – urugero rwa hafi ni Réne Mugenzi uherutse gufatwa ashyikirizwa ubutabera kubera ubujura aho yibye amafaranga ya Kiriziya yo mu bwongereza.

Nicola Palmer, umwe mu barimu ba Kaminuza ya King’s College London, aherutse kwemeza ko ubutabera bw’u Rwanda bufitiwe icyizere n’amahanga ashingiye ku kuba ibihugu bigera 20 bibamaze kohereza abantu bagera ku 122 bacyekwaho uruhare muri Jenoside yakorewe Abatutsi kuburanishwa n’inkiko z’u Rwanda.

Bamwe mu bajenosideri ruharwa boherejwe harimo Jean Twagiramungu, Ladislas Ntaganzwa, Bernard Munyagishari, na Dr. Leopold Munyakazi. Ibi bikwiye kuba urugero rwiza no ku bindi bihugu bikiri indiri y’abagize uruhare muri Jenoside yakorewe Abatutsi mu 1994.

Yanditswe na Ellen.K

Siga igitekerezo

This site uses Akismet to reduce spam. Learn how your comment data is processed.

%d bloggers like this: