Iby’abajenosideri biribwa n’ibigarasha!

Mu mwaka wa 2010 ni bwo ibigarasha binyuze mu kiryabarezi cyabyo cyizwi nka RNC byatangije gucinya inkoro ku miryango ikize y’abajenosideri bihishe hirya no hino ku Isi ari na ko bibakamuramo amafaranga atagira ingano bibizeza kuzabatahukana mu Rwanda.

Kwizezwa gusubizwa mu Rwanda n’agatsiko k’abanyabyaha batatiye igihango cy’inkotanyi bagakora amakosa atandukanye yatumye batoroka igihugu, biri mu byateraga akanyabugabo abajenosideri cyane ko ku bwabo yari inzira nziza nyayo yo kurangiza umugambi wa Jenoside yakorewe Abatutsi wabapfubanye ubwo Inkotanyi zayihagarikaga zikanabohora igihugu.

 

Umuryango w’umunyemari Kabuga Felesiyani, umuterankunga ukomeye wa Jenoside kimwe n’umuryango wa Habyarimana Juvenal “Kinani”, umunyagitugu wategetse u Rwanda imyaka irenga 20 akanaruganisha kuri Jenoside yakorewe Abatutsi, ni bamwe mu binjiriwe n’ibigarasha maze babihonga ama miliyoni y’amadorali ngo bakunde bagarurwe mu Rwanda nk’uko amakuru yizewe MY250TV ifite abahamya.

 

Nk’urugero, ikigarasha Rudasingwa Théogene mu mwaka wa 2013 kinjiriye umukwe wa Kabuga, Dr Murayi Paulin maze kimakuramo 357,300 by’amayero angana na miliyoni zirengaho gato 357 z’amafaranga y’u Rwanda, Rudasingwa akaba yarabeshye ko ariya mafaranga yari gukoreshwa mu gushinga ‘Radio Impala’ yagombaga gusimbura Radiyo rutwitsi RTLM yari yarashinzwe Kabuga abigizemo uruhare runini kugira ngo ikwirakwize ingengabitekerezo ya Jenoside.

Uwo muzindaro ngo wagombaga gushyirwa i Kampala muri Uganda ubundi ukajya wumvikana hirya no hino ku Isi hakoreshejwe imirongo migufi izwi nka Short Wave (SW), ukaba by’umwihariko ngo wagombaga kujya utambutswaho icengezamatwara risa neza nk’iryakorwanga na RTLM mu gihe cya Jenoside yakorewe Abatutsi.

Icyakora, ariya mafaranga yose Rudasingwa yayakubise mu mufuka maze mu kujijisha atangiza ingirwa radiyo yavuze iminsi itagera no kuri itatu ubundi ihita iceceka cyane ko yari yubatswe mu byuma bishaje cyane, nk’uko isoko y’amakuru yacu ibihamya. Ibyo bikaba byaratumye uriya mukwe wa Kabuga ajyana Rudasingwa mu nkiko, magingo aya rukaba rukigeretse hagati y’abo bagabo bombi.

Ikihebe Kayumba Nyamwasa na cyo cyakusanyije akayabo k’amamilioni y’amayero kwa Mukahabyarimana, Agathe Kanziga, hamwe n’imiryango ya benewabo intego ari ukubafasha “kugaruka mu Rwanda nk’intwali”, gusa byarangiye ayo mafaranga igisambo Kayumba ayitangirijemo ikigo cy’ubwikorezi muri Afurika y’epfo, aho afite imodoka za rukururana mu muhanda zamufashishe kwigwizaho ubutunzi butandukanye.

Burya koko “iby’abapfu biribwa n’abapfumu!” Ibigarasha bya RNC nyuma yo kwakira amafaranga ya bene Kabuga na Kinani byayakubise ku mufuka icyakora bigerageza kuzamura intambara y’amagambo k’u Rwanda ariko nayo irabipfubana kugeza ubwo urusaku rwabyo ruzimira burundu nk’amahembe ya rya tungo cyane ko bizi neza ko ikiguzi cyo guhungabanya umutekano w’u Rwanda gihenze cyane!

Hirya ya bene Kabuga na Kinani, hari indi miryango y’abajenosideri yihishe hirya no hino ku Isi ikomeje kunyunyuzwa n’ibigarasha bibarizwa mu mitwe itandukanye y’iterabwoba yiyita ko irwanya u Rwanda; izi nterahamwe n’abajenosideri batanga imisanzu itagira ingano ibigarasha bibizeza ko bizabarwanirira bakagaruka mu rwababyaye; ibintu nyamara bitazapfa bishobotse.

Ikigaragara iby’abajenosideri biribwa n’ibigarasha aka wa mugani ko “iby’abapfu biribwa n’abapfumu!” Inama ku bajenosideri ni uko bakwirega bakemera icyaha kuko ibigarasha ntibizahwema kubakamuramo amafaranga kandi nta n’aho bazacikira ubutabera cyane ko icyaha cya jenoside kitajya gisaza.

 

Faith Gatako

 

 

 

Siga igitekerezo

This site uses Akismet to reduce spam. Learn how your comment data is processed.

%d bloggers like this: