December 7, 2022

Perezida Kagame yagiranye ibiganiro na Meya wa New York

Perezida Kagame yahuye na Meya w’Umujyi wa New York, Eric Adams, ku gicamunsi cyo kuri uyu wa Gatanu baganira ku mahirwe y’ubufatanye ahari, iterambere ry’ubukungu bw’u Rwanda ndetse na gahunda zarwo zo kwishakamo ibisubizo nk’Umuganda na Car Free Day.

Perezida Kagame ari muri Leta Zunze Ubumwe za Amerika, aho azaba yitabiriye Inama y’Umuryango w’Abibumbye izabera i New York mu cyumweru gitaha. Izaba yiga ku buryo bwo guhangana n’ibibazo bibangamiye ikiremwamuntu muri iki gihe.

Birimo icyorezo cya Covid-19 n’ingaruka zacyo, intambara ya Ukraine, imihindagurikire y’ibihe, ihungabana ry’ubukungu bw’Isi n’ibindi bibazo by’urusobe bigoye ikiremwamuntu.

Gahunda ya Car Free Day, Umukuru w’Igihugu yaganiriye na Meya Eric Adams, ni siporo rusange yatangijwe muri Gicurasi 2016 iba inshuro imwe mu kwezi. Mu ntangiriro za 2018 ni bwo Perezida Kagame yasabye ko yajya iba kabiri mu kwezi.

Usibye gutoza abantu umuco wo gukora siporo, bashishikarizwa no kwirinda indwara zitandukanye zirimo izitandura, aho bahabwa inama bakanapimwa izi ndwara ku buntu.

Imihanda yo muri Kigali iri bukoreshwe iba ifunze ku binyabiziga, abanyamaguru n’abakoresha amagare muri siporo ari bo bemerewe kuyigenda.

Ni siporo imaze kumenyerwa aho abakuru n’abato bazinduka iya rubika, bakananura imitsi. Nubwo yatangiriye mu Mujyi wa Kigali, iyi siporo imaze kuba umuco ugenda ukura, cyane ko no mu zindi ntara abaturage bari kugenda bitabira gukora iyi siporo rusange.

Umuganda ni kimwe mu bikorwa by’ubudasa bw’u Rwanda rwagezeho gihuriza hamwe abaturage buri wa Gatandatu wa nyuma w’ukwezi, cyashyizweho n’itegeko No 53/2007 ryo ku wa 17/11/2007 ryavuguruwe kugeza ubu. Ukorwa hagamijwe guteza imbere ibikorwa by’amajyambere n’isuku, kunganira ingengo y’imari mu bijyanye no gusana ibikorwaremezo no gutuma abantu basabana.

Perezida Kagame yahuye na Meya w’Umujyi wa New York, Eric Adams ku gicamunsi cyo kuri uyu wa Gatanu

Ibiganiro byabo byagarutse ku iterambere ry’ubukungu mu Rwanda

Baganiriye kandi kuri gahunda zo kwishakamo ibisubizo nka Car Free Day n’Umuganda

Perezida Kagame ari i New York aho azanitabira inteko rusange ya Loni

iyi nkuru tuyikesha Igihe

Leave a Reply

%d bloggers like this: