January 30, 2023

Byinshi kuri Christine Uwizera “Coleman”, umuhanuzi w’ikinyoma ukomeje gukwirakwiza ingengabitekerezo ya Jenoside

Ni umugore upima ibiro nk’iby’inkoko ariko wifitemo amacakubiri n’ingengabitekerezo ya Jenoside bimurusha uburemere mu gihe nyamara yiyita “umukozi w’Imana”.

Uwo ni Uwizera Christine wiyita Coleman, umugore wihebeye ingengabitekerezo ya Parmehutu, atuye muri Leta zunze ubumwe za Amerika muri Leta ya Colorado aho afite  urusengero yise “The Blazing Holy Fire Church’’.

Igitangaje ni uko urwo rusengero atarukoresha yigisha iby’Imana ahubwo arukoresha mu gukwirakwiza ingengabitekerezo ya Jenoside, gupfobya Jenoside yakorewe Abatutsi no guharabika ubuyobozi bw’u Rwanda.

Uwizera yavukiye mu karere ka Gakenke ho mu ntara y’Amajyaruguru, yiga mu mashuri arimo urwunge rw’amashuri rwa Rambura aho abanyeshuri biganaga bahamya ko yangaga Abatutsi urunuka ndetse yajyaga anabatoteza.

Yavuye mu Rwanda muri 1997 maze ageze muri Amerika yihoma ku mugabo w’umuzungu witwa Colman; akaba ari yo mpamvu akoresha iryo zina mu rwego rwo kwiyoberanya by’umwihariko ku batamuzi.

Umuhezanguni Uwizera ntasiba gucuruza ikinyoma cy’uko ngo ari imfubyi aho avuga ko ababyeyi be “bishwe muri jenoside” mu gihe nyamara bizwi neza ko papa we, Dominique Dirimasi wigeze kuba Perefe w’icyahoze ari perefegitura ya Kibungo na nyina Marie Akimanizanye bose bapfuye bazize imfu zisanzwe.

Ku rundi ruhande, uyu mugore ni umwe mu bahezanguni bavuga ko mu Rwanda habaye “jenoside ebyiri”, ikinyoma gikwirakwizwa n’abagize uruhare muri Jenoside yakorewe Abatutsi mu rwego rwo kuyobya uburari.

Nk’urugero, Uwizera mu kanwa ke hahoramo igihuha cy’uko ngo RPF/A-Inkotanyi “yamwiciye ababyeyi”, imvugo akoresha ajijisha abantu cyane ko musaza we witwa Jean Dirimasi yakoze jenoside akaba yarahungiye ubutabera muri Uganda.

Uwizera Christine iby’idini rye muri iyi minsi bisa n’ibyamunaniye kuko yabuze abayoboke bitewe n’ubuhezanguni bwe abantu batangiye kumenya.

Nk’urugero, nyuma yo kwandika igitabo yise “SOS-Rwanda’s 30-Year Apocalypse” cyuzuyemo ibinyoma no guharabika leta y’u Rwanda, ubu yashinze umuzindaro wa YouTube avugiraho umunsi wose kugeza ivata rije.

Bimwe binyoma iyi nkotsa icururiza kuri uwo muzindaro rutwitsi harimo ko ngo “Leta y’u Rwanda ishimuta abantu”; ibintu avuga ariko ntabibonere ikimenyetso na kimwe cyane ko biba bitabaye.

Nyuma kandi yo kubona ko n’umuzindaro we wa YouTube utarimo gutanga umusaruro, Uwizera yakoze urubuga rwa murandasi yirirwa asaba abantu gushyiraho “amazina y’abahutu bishwe na FPR”, gusa igitangaje ni uko n’urwo rubuga nta muntu urwitayeho cyane icyo avuga ko rugamije kitabayeho.

Iyi nkotsa y’umugore idashyira uturaso ku mubiri ikwiye kumenya ko ibyo yishoyemo nta musaruro bizigera bitanga kandi bitinde bitebuke azaryozwa ingengabitekerezo ya Jenoside ahora akwirakwiza.

Mugenzi Félix

Leave a Reply

%d bloggers like this: