January 30, 2023

Igisobanuro cy’iya Mbere Ukwakira interahamwe n’abajenosideri bashaka kugoreka

Tariki ya Mbere Ukwakira 1990 ingabo zari iza RPF-Ikotanyi zatangije urugamba rwo kubohora igihugu cyari imaze imyaka cyaraboshywe na Leta zari zarimakaje amacakubiri no guheza igice kimwe cy’Abanyarwanda aribo Abatutsi.

Mu myaka yabanje, impunzi zari zarahunze ubwicanyi n’ubugizi bwa nabi bwahereye mu 1959, zari zaragiye zigerageza gutahuka mu gihugu cyazo kugira ngo zisubirane uburenganzira bwazo nk’Abanyarwanda ariko ntibizikundire.

Uwo muhate wakunze gucibwa intege na Leta ebyiri zakurikiranye, uhereye kuri Repubulika ya Mbere ya Grégoire Kayibanda (1962-1973) n’iya Kabiri y’umunyagitugu Juvenal Habyarimana (1973-1994).

Mu gusubiza ubusabe bw’izo mpunzi zasabaga kwemererwa gutaha mu gihugu cyazo, Habyarimana we ubwe yashimangiye ko u Rwanda rumeze nk’ikirahure cyuzuye amazi bityo ko bariya banyarwanda bari baramenshejwe baramutse batashye ayo “mazi yameneka”. 

N’ubwo impunzi nyinshi zari zimaze imyaka zarahejwe ndetse hari n’abavukiye mu buhungiro batari baragakandagiye mu Rwanda bagumanye igihugu k’umutima ndetse bakumva uko byagenda kose bagomba guzasubira mu gihugu bafitemo inkomoko.

Nyuma y’uko RPF-Inkotanyi igerageje inzira zose zishoboka z’ibiganiro na Leta ya Habyarimana bikanga, yafashe umwanzuro wo kubohora igihugu maze tariki ya 1 Ukwakira 1990 ahagana saa yine z’amanwa, umupaka wa Kagitumba ugabwaho igitero cyabaye ikimenyetso cy’itangira ry’urugamba rwamaze imyaka ine.

U Rwanda tubona uyu munsi ni umusaruro w’urugamba rwatangiye ku itariki 1 Ukwakira 1990. Uku kwezi ni ukw’umugisha ku banyarwanda kuko cyabaye igihe cyatangirijweho urugamba rwabahaye u Rwanda rwiza bafite uyu munsi.

Ni mu gihe interahamwe n’abajenosideri bihishe hirya no hino ku Isi bakomeje kugoreka amateka y’iyi tariki mu rwego rwo kuyobya uburari ku ruhare bagize muri Jenoside yakorewe Abatutsi mu 1994; ibintu ariko bitazigera bibahira.

Umulisa Carol

Leave a Reply

%d bloggers like this: