January 30, 2023

Umunyarwandakazi wese ni ‘don’t touch!’ : Umugore ku isonga mu iterambere ry’u Rwanda mu myaka 28 ishize

Mu myaka yo hambere mu Rwanda hari harimakajwe imyumvire y’uko umugore inshingano zonyine afite mu muryango ari ukurera abana ndetse no gukora imirimo yo mu rugo yewe yaba anabyaye umukobwa ntibyishimirwe nk’uko byagendaga yabyaye umuhungu.

Ku mugabo, “kwikubitira umugore” byari ishema aho n’abana b’abahungu babyirukaga berekwa ko bafite agaciro gasumbye kure aka bashiki babo cyane ko abakobwa batabaga bemerewe kuzungura cyangwa guhabwa umunani.

Iyo myumvire iciciritse iri mu byo Umuryango RPF-Inkotanyi washyizemo imbaraga zigaragarira buri wese mu guhindura nyuma yo guhagarika Jenoside yakorewe Abatutsi mu 1994 no kubohora u Rwanda.

Perezida Paul Kagame we ubwe ntasiba kugaragaza ko afitiye ikizere gikomeye Abanyarwandakazi kandi ko ashishikajwe no kuvanaho inzitizi zose zifitanye isano n’amateka zizitira umugore by’umwihariko zikamubuza kugira uruhare mu iterambere ry’igihugu.

Nk’urugero Perezida Kagame kuwa 23 Nyakanga 2017, ubwo yaganirizaga abaturage bo mu Ntara y’Uburasirazuba yeruye ko hirya y’ikizere Leta ifitiye abanyarwandakazi, hanashyizwe imbere kurwanya icyabahunganya cyose.

Icyo gihe yagize ati: “Umukobwa, umunyarwanda kazi wese ni don’t touch [ntakinishwa]…”

Magingo aya kuba umugore yaratejwe imbere ni ibintu bigaragarira buri wese cyane ko hanashyizweho amategeko avanaho ikandamizwa ryose yakorerwaga harimo kwimwa uburenganzira kw’izungura, hanashyirwaho by’umwihariko amategeko ahana ihohoterwa ryose yakorerwaga.

Uko umunyarwandakazi afashwe uyu munsi ni ibintu Isi yose itangarira aho by’umwihariko ibihugu bitandukanye harimo yewe n’iby’ibihangange bidasiba kuza mu Rwanda mu gushaka ubunararibonye kw’ibanga ryakoreshejwe.

Nk’urugero rugaragarira buri wese ni uko 61.3% mu nteko nshingamategeko umutwe w’abadepite na 36% mu mutwe wa senat bigizwe n’abategarugori.

Ntabwo twakwirengagiza kandi ibigo bitandukanye bikomeye biyobowe n’abategarugori harimo igishinzwe kwihutisha iterambere (RDB) na Sosiyete y’Igihugu ishinzwe ubwikorezi bwo mu Kirere (Rwandair) yo ifite n’akarusho ko kuba ikoresha n’umupilote w’umutegarugori.

Uwo mupilote yiyongera ku bandi benshi bari mu ngabo z’u Rwanda, Polisi y’Igihugu ndetse no muri ‘Akagera aviation’.

Ingero ni nyinshi zikomeza kugaragaza uruhare runini umutegarugori afite mu iterambere ry’umuryango nyarwanda; ibintu biterwa ahanini no kuba politike y’uburezi yaravuguruwe aho ubu abagore babasha kwiga ndetse bakanaminuza nk’uko basaza babo babikora.

Ibi byose twavuze ruguru bikwiye guha isomo abanyarwanda muri rusange ko umwali n’umutegarugori bashoboye kandi ko uruvuze umugore ruba ruvuze iterambere.

Umutesi Grace

Ibikubiye muri iyi nyandiko ni ibitekerezo bwite by’umwanditsi. Umutesi Grace ni umubyeyi akaba na Rwiyemezamirimo uterwa ishema no kuba yarasubijwe agaciro mu gihugu abamukomokaho bari barakavukijwe.

Leave a Reply

%d bloggers like this: