November 28, 2022

Inshuti uyibonera mu byago: Zimbabwe iri mu bihano by’ubukungu yanyuzwe na miliyoni 800$ yakusanyirijwe na Perezida Kagame

Inshuti nyayo uyibonera mu byago! Ni yo ntero n’inyikirizo y’abaturage n’abanyepolitike bakuru muri Zimbabwe, igihugu giherereye mu majyepfo ya Afurika.

Ni nyuma y’uko bamenye ko Perezida Kagame yagobotse igihugu cyabo akagifasha gukusanya miliyoni 800 z’amadorali ya Amerika zizakoreshwa mu kugeza amashanyarazi mu cyaro cy’icyo gihugu.

Ni inkuru abaturage ba Zimbabwe bamenye bayikuye kuri Perezida wabo, Emmerson Mnangagwa, mu mpera z’icyumweru gishize ubwo yari mu bikorwa by’ishyaka rye Zanu-PF mu gace ka Chiredzi.

Imbere y’imbaga y’abaturage, adaciye ku ruhande Perezida Mnangagwa yashimiye mugenzi we w’u Rwanda, Paul Kagame, ku bwo gufasha Zimbabwe muri gahunda yayo yo kugeza ku baturage umuriro w’amashanyarazi.

Perezida Mnangagwa yahishuye ko yiyambaje Perezida Kagame ngo amufashe kureba uko amafaranga akenewe muri iriya gahunda yaboneka kuko igihugu cye cyafatiwe ibihano.

Yagize ati: “Ibi byabaye nyuma y’uko tuganiriye nkamubwira nti ‘muvandimwe igihugu cyacu kiri mu bihano ariko dufite gahunda igamije kugeza amashanyarazi kuri buri muturage wa Zimbabwe aho yaba ari hose’. Nyuma Perezida Kagame yavugishije inshuti ze, akusanya miliyoni 800$.”

Muri iyo mbwirwaruhamwe kandi, Perezida Mnangagwa yamenyesheje abaturage b’igihugu cye ko Perezida Kagame azaza kwifatanya nabo mu birori byo gutangiza iriya gahunda yo kugeza amashanyarazi mu bice by’icyaro mu mpera z’uko kwezi nk’uko bitangazwa n’umunyamakuru wa The New Times wari aho igikorwa cyabereye.

Hirya ya buriya bufasha, ,muri Kamena 2020 Perezida Paul Kagame yari yasabiye Zimbabwe gukurirwaho ibihano by’ubukungu yafatiwe kugira ngo ibashe guhangana n’icyorezo cya Coronavirus.

Abasesenguzi bahuriza ku kuvuga ko ubufasha Perezida Kagame yageneye Zimbabwe muri ibi bihe iremerewe n’ibihano by’ubukungu yafatiwe, bushimangira ko Kagame ari umunyafurika wa nyawe (a real Pan-Africanist) kandi ko kwigira kwa Afurika bishoboka.

Umwe mu bakoresha urubuga rwa Facebook yanditse ati: “Afurika ikeneye abandi bayobozi nka Kagame ngo turusheho kwigira no kwihesha agaciro; ubufasha yahaye Zimbabwe ni ikindi kimenyetso ko afite Afurika ku mutima kandi ko Abanyafurika twese dushyize hamwe twazamura umugabane wacu.”

Ku rundi ruhande, mu bwirwaruhame za Perezida Kagame akunze kugaragaza ko ibisubizo by’ibibazo byinshi Afurika ihura nabyo biri mu biganza byayo; ubufasha yageneye Zimbabwe bukaba bushimangira ko imvugo ye ari yo ngiro.

Ubwanditsi

Leave a Reply

%d bloggers like this: