February 4, 2023

Musana Jean Luc akomeje kugaragaza ko igihe cyose yamaze mu ishuri yashyushyaga intebe gusa!

Umuhanga yabivuze neza ko ‘uko inkende ikataza mu kurira ibiti ni nako irushaho kugaragaza ubwambure bwayo’, uku ni nako bimeze kuri Musana Jean Luc, inyigaguhuma idasiba kwiyita umunyapolitike kandi nta kintu yifitiye mu mutwe.

Nk’urugero, iyi nsoresore y’imyaka 31 kuri uyu wa 19 Ukwakira 2022 yagaragaye ku muzindaro wayo wa YouTube yashinze ihuragura amagambo abasesenguzi bemeza ko ashimangira uburyo amashuri yose yize nta cyo yamwunguye.

Muri icyo kiganiro kitari gifite epfo na ruguru, Musana adasiba kwikomanga mu gatuza ko afite “impamyabumenyi” y’ikiciro cya kabiri cya kaminuza mu bijyanye n’ubukungu, yumvikana avuga “Leta iri gushonjesha Abanyarwanda” kubera ko iri gushyira ku isoko impapuro mpeshamwenda.

Iyi ngirwa munyapolitike icyo itazi cyangwa yirengagiza nkana ni uko gushyira ku isoko impapuro mpeshamwenda ari ishoramari Leta zose zisobanutse zikora ndetse ari uburyo bwiza bufasha abaturage babyifuza kuguriza Leta ndetse ikazabungukira.

Ikindi Musana akwiye kumenya kandi ni uko ufite izi mpuro adategereza kuzungukirwa na Leta gusa cyane ko Leta yanatanze amahirwe yo kuba umuntu uzifite yazitanga nk’ingwate muri banki akaba yakwaka inguzanyo akiteza imbere.

Uyu muhungu kandi yumvikanye yegeka ibibi byose kuri Leta y’u Rwanda kubera ko ngo ibiciro byazamutse; ikintu kigaragaza ubujiji bwamubase cyane ko iki ari ikibazo cyugarije Isi yose muri iki gihe.

Musana wapfuye uhagaze ntashobora kubona ko Leta y’u Rwanda ikomeje gukora byinshi ngo ihangane n’iki kibazo aho by’umwihariko yashyizeho gahunda nyinshi zitandukanye zo gufasha no gushyigikira abaturage ngo batazahazwa n’iki kibazo.

Muri izo gahunda harimo iya ‘Nkunganire’ aho Leta yigomwa byinshi ndetse ikanafasha umuturage mu giciro cya serivisi zinyuranye zirimo  iz’ubuhinzi, ubwikorezi, ubworozi n’ibindi.

Iyi gahunda ya ya nkunganire imaze gutanga umusaruro kuko muri uyu mwaka gusa, guverinoma yakubye inshuro enye ikiguzi yashyiraga muri nkunganire igenerwa ifumbire mvaruganda.

Umuhezanguni Musana kandi akwiye kumenya ko, leta y’u Rwanda ihoza umuturage ku isonga, na mbere yuko ibiciro ku masoko bizamuka, abaturage bahabwaga ibibatunga nta kiguzi batswe mu gihe cya guma mu rugo ubwo imirimo myinshi itari irimo ikorwa kubera icyorezo cya Corona virus.

Impamvu itera umuhezanguni Musana kwirirwa asakuza avuga ibyo abonye, ni ugukorera mu kwaha k’umuhezanguni mukuru Ingabire Victoire, aho amubwira ibyo agomba kujya gutangariza kuri YouTube muri gahunda akomeje yo kuyobya abanyarwanda, kwanduza isura y’u Rwanda ndetse no koreka urubyiruko.

Icyo aba bombi bakwiye kumenya nuko kwirirwa bakwirakwiza ibinyoma k’u Rwanda bidateze gutuma Leta idashyira umuturage ku isonga, ahubwo bizabata mu rwobo bizabagora kwikuramo.

Umulisa Carol

Leave a Reply

%d bloggers like this: