February 4, 2023

‘Made in Rwanda’, indi ntabwe idasubira inyuma ikomeje gufasha u Rwanda kwihesha agaciro

Nyakubahwa Perezida wa Repubulika, Paul Kagame, akunze kugaragaza ko u Rwanda rukwiye kwishakamo ibisubizo no kwihesha agaciro haherewe ku mateka yihariye Abanyarwanda banyuzemo.

Ni muri urwo rwego u Rwanda rwabaye rwivanye mu masezerano y’ubucuruzi bimwe mu bihugu bya Afurika bifatanye na Leta zunze Ubumwe za Amerika azwi nka AGOA, mu gukora ibyo u Rwanda rwahagaritse gutumiza hanze imyenda yambawe abenshi bita ‘Caguwa’.

U Rwanda rwiyemeje guhara inyungu zari kuva muri ariya masezerano aho gutanga agaciro k’abanyarwanda kuko Perezida Kagame yigeze gushimangira ko u Rwanda rwahisemo kwihesha agaciro bityo ko adashyigikiye ko rwaba indiri ijugunywamo ibyakoreshejwe ahandi.

Umukuru w’Igihugu yigize kubwira itangazamakuru ati: “U Rwanda n’ibindi bihugu bikubiye muri AGOA, hari byinshi tugomba gukora mu guteza imbere ubukungu bwacu. Ese uhitamo kwakira ibyakoreshejwe [caguwa] kuko AGOA ibigutegetse cyangwa uhitamo guteza imbere inganda Abanyarwanda bifuza?”

Perezida Kagame kandi ntiyahwemye kugaragaza ko u Rwanda rukwiye gushaka uburyo bwihuse bwo kwikorera imyenda yo kwambara bityo rukiteza imbere kandi rugateza n’abanyarwanda imbere.

Mu mwaka wa 2015 imvugo yabaye ingiro hanyuma Guverinoma y’u Rwanda itangiza gahunda ya ‘Made in Rwanda’ iyi akaba ari politike igamije guteza imbere ibikorerwa imbere mu gihugu.

Iyo kandi ni intwaro itwemerera nk’igihugu guhangana ku isoko mpuzamahanga mu bukungu, gukuza umuco wo kwigira binyuze mu gukorera mu gihugu ibyo dukeneye tutagiye ku bishakira mu mahanga.

Made in Rwanda ni igikorwa dukwiriye kwishimira nk’Abanyarwanda kuko kuva mu mwaka wa 2015 ubwo iyi gahunda yatangizwaga hagaragaye itumbagira ry’ubucuruzi bw’ibikorwa by’inganda z’Abanyarwanda n’ubukungu bw’igihugu muri rusange.

Kuva muri uwo mwaka kugeza mu 2019 ubukungu bwazamutse ku kigero cya 10% buri mwaka, aha kandi ntiwakwirengagiza ko ibyo byose bikomeje kuzamura amafaranga y’amanyamahanga yinjira mu gihugu cyane ko ibikorerwa mu Rwanda byoherezwa hanze.

Abenshi iyo havuzwe ‘Made in Rwanda’ bumva ko ari imyambaro gusa, ariko nyamara siko bimeze kuko ibikorerwa mu Rwanda ni byinshi kandi niko byose bitanga umusaruro ku isoko mpuzamahanga bikagirira umumaro ba rwiyemezamirimo ndetse n’igihugu muri rusange.

Aha twavuga nk’ibiribwa n’ibinyobwa bitunganywa, telefoni zigezweho zikorerwa mu Rwanda, imodoka ziteranyirizwa mu Rwanda, utudege tutagira abapolote (drones) dufasha mu gukwirakwiza amaraso, inkingo, imiti n’ibindi tutibagiwe n’ibindi binyuranye byoherezwa mu mahanga bimaze gutunganyirizwa mu Rwanda.

Si ba rwiyemezamirimo bagerwaho n’ibyo byiza gusa ahubwo iyi gahunda yagabanyije ikibazo cy’ubushomeri mu Rwanda cyane ko izo nganda zitanga imirimo ku benegihugu barimo abakuru ndetse n’abato; ibyo bituma babasha kwiteza imbere mu buzima bwabo bwa buri munsi ndetse bakivana mu bukene.

 ‘Made in Rwanda’ navuga kandi ko ari gahunda yatumye abanyarwanda bitinyuka by’umwihariko mu kugaragaza impano bifitemo – baratinyutse bahanga udushya haba mu mideli, ikoranabuhanga mu bya mudasobwa n’ibindi bikomeje kuzamura ibendera ry’u Rwanda mu ruhando mpuzamahanga.

Guteza imbere ibikorerwa mu Rwanda hagamijwe guharanira icyashyira u Rwanda ku isonga biri muri imwe mu mihigo ya Nyakubahwa Perezida wa Repubulika yemereye abaturarwanda muri iyi manda y’imyaka 7 ibura imyaka ibiri ngo igere ku musozo.

Nk’ibisanzwe imvugo ye yabaye ingiro cyane ko dukomeje kubona ibikorerwa mu Rwanda byiyongera umunsi ku wundi; ibi twe nk’Abanyarwanda nta n’umwe uvuyemo dukwiye kubimushimira ndetse iyi gahunda ya ‘Made in Rwanda’ tukayigira iyacu.

Iterambere ry’u Rwanda riri mu maboko yacu kandi kwigira no kwihesha agaciro ni byo bizatuma turigeraho.

Rwatubyaye Yvette

Ibikubiye muri iyi nyandiko ni ibitekerezo bwite by’umwanditsi. Rwatubyaye Yvette ni umubyeyi w’abana babiri ubarizwa i Kigali, akaba ashishikajwe no kugaragariza amahanga uburyo u Rwanda rukomeje kwiyubaka nyuma yo gushegeshwa na Jenoside yakorewe Abatutsi mu 1994.

Leave a Reply

%d bloggers like this: