November 28, 2022

Akabaye icwende ntikoga: Uwimana Agnes yongeye kumvikana apfobya Jenoside yakorewe Abatutsi, gusa ntibikwiye kurangirira aha!

Umuhezanguni Uwimana Nkusi Agnes wigeze gufungwa azira guhakana no gupfobya Jenoside yakorewe abatutsi, yongeye gushimangira ko n’uyu munsi akiri intumva ubwo noneho yihandagaza akita iyi Jenoside “amakimbirane hagati y’abahutu n’Abatutsi”.

Yabivugiye mu kiganiro aherutse kugira n’umwe mu mizindaro ya YouTube ikomeje gutangaza za byacitse.

Mu rwego rwo gutoneka ku bushake abarokotse Jenoside yakorewe Abatutsi uyu mugore w’umugome yavuze ko “nta buvugizi bakwiriye gukorerwa” kuko ngo “Abanyarwanda bose bababaye kimwe”.

Ayo magambo y’uyu muhezanguni usibye kuba apfobya Jenoside yakorewe Abatutsi, icyaha gihanwa n’ amategeko y’ u Rwanda, avuguruza Itegeko Nshinga rya Repubulika y’u Rwanda rizirikana abacitse ku icumu.

Ingingo ya 50 y’iri tegeko ivuga ko: “Leta, mu bushobozi bwayo no mu buryo buteganywa n’amategeko, ifite inshingano zo guteganya ibikorwa byihariye bigamije imibereho myiza y’abatishoboye bacitse ku icumu rya Jenoside yakorewe Abatutsi.”

Ni ibintu bibabaje kuba umuhezanguni Uwimana yaranze kwigira ku bihano yagiye ahabwa mbere aho na nubu akomeje guhembera irondamoko mu Banyarwanda akaba ndetse adaterwa ipfunwe na politike mbi y’ubutegetsi bw’igitugu bwateguye bunashyira mu bikorwa Jenoside na n’uyu munsi agishyigikiye.

Ingengabitekerezo ya Jenoside yasaritse Uwimana ayikomora mu muryango yavutsemo n’uwo yashatsemo, gusa ubutabera bukwiye gusuzuma imvugo rutwisi z’uyu mugore maze agakanirwa urumukwiriye.

Ntibikwiye ko Abanyarwanda bakomeza kugaburirwa urwango kuko amaherezo yarwo twarayabonye mu mwaka wa 1994.

Mutijima Vincent

Leave a Reply

%d bloggers like this: