November 28, 2022

Tshisekedi ari guhamagarira abanye-Congo gukora Jenoside nk’uko Habyarimana “Kinani” yakoresheje interahamwe!


Perezida wa Repubulika iharanira Demokarasi ya Congo, Félix Tshisekedi aherutse gusaba urubyiruko rw’abanye-Congo kwifatanya ingabo ze (FARDC-FDLR) hagamijwe kurwanya u Rwanda we yita “umwanzi”.


Imvugo za Tshisekedi ntaho zitaniye n’izakoreshwaga n’ubutegetsi bw’igitugu bwateguye bunashyira mu bikorwa umugambi wa Jenoside yakorewe Abatutsi mu Rwanda mu mwaka wa 1994.


Nk’urugero, hagati y’umwaka wa 1990 n’uwa 1994 Habyarimana Juvenal “Kinani” yumvikanye mu bwirwaruhame zinyuranye ahamgarira urubyiruko rw’interahamwe gufatanya n’ingabo z’igihugu mu kurwanya uwo nawe yitaga “umwanzi” aribo abatutsi.


Imbwirwaruhame za Habyarimana zakurikiwe no guha intwaro n’imyitozo ya gisirikare urubyiruko aho rwahise rushyirwa ku ruhembe mu kwica Abatutsi hirya no hino mu gihugu.


Nk’uko bigaragarira buri wese, nta tandukaniro riri mu biri kubera muri Congo uyu munsi n’ibyabaye mu Rwanda mu myaka 28 ishize cyane ko inzira zose zakoreshejwe na Leta y’abicanyi mu Rwanda ari na zo Tshisekedi ari gukoresha.


Ni mu gihe uyu mutegetsi wa Congo abo yita “umwanzi” ari Abanye-Congo bavuga ururimi rw’Ikinyarwanda bo mu bwoko bw’Abatutsi; aba akaba abashinja kuba bafitanye isano n’umutwe wa M23 urwanya ubutegetsi bwe.


Mu kumvira inama zitangwa n’abategetsi ba Congo, urubyiruko rw’icyo gihugu rukunze kwigaba mu mihanda mu cyo bita “imyigaragambyo yamagana u Rwanda” aho baba bafite imihoro, amahiri, inkoni, amabuye n’ibindi bikoresho gakondo bisa n’ubundi nk’ibyakoreshwaga n’interahamwe mu Rwanda.


Iyo myigaragambyo ntirangirira mu mihanda gusa cyane ko uru rubyiruko rukora imikwabo yo guhiga abanye-Congo bavuga Ikinyarwanda bakabica, bakabatwika ndetse hagiye hanagaragara aho babarya nyuma yo kubatwika.


Nta kabura imvano, kuba Tshisekedi n’ubutegetsi bwe bahitamo inzira zakoreshejwe n’interahamwe babiterwa n’uko banywanye n’umutwe w’iterabwoba wa FDLR ugizwe n’interahamwe kabombo zatorokeye ubutabera muri Congo mu myaka 28 ishize.


Izi nterahamwe zo muri FDLR zivuna umuheha zikongezwa undi muri Congo cyane ko zamaze kwinjizwa mu gisirikare cy’icyo gihugu (FARDC) aho zigira ijambo rya nyuma ku byemezo bifatwa harimo n’aho ziherutse kugira uruhare mu iterwa ry’ibisasu byangije byinshi mu Rwanda.


Tshisekedi n’ubutegetsi bwe ntibazatinda kubona ko bikururiye ibibazo bikomeye igihe bahaga rugari FDLR n’interahamwe bakazikoresha muri politike y’amafuti yabo aho kuzirwanya.


Ku rundi ruhande, byamaze kumenyekana ko Tshisekedi ahora yegeka k’u Rwanda ibirego bidafite ishingiro mu rwego rwo kuburizamo amatora azaba mu mwaka utaha dore ko abanyekongo batakimushaka, gusa ibyo arimo ntibizamuhira!


Mugenzi Félix

Leave a Reply

%d bloggers like this: