November 28, 2022

Abanyarwandakazi bakomeje guhesha ishema u Rwanda, “kudatesha agaciro uwakadusubije” ni yo ntego!


Nyuma y’imyaka 28 ingabo zari iza RPF/A-Inkotanyi zihagaritse Jenoside yakorewe Abatutsi ubu umunyarwandakazi abayeho uko atigeze abaho kuva u Rwanda rwabaho nk’umusaruro w’ubuyobozi bwiza bwasubije agaciro buri munyarwandakazi ndetse bunamuteza imbere.


Ku wa 1 Ugushyingo 2022, Avance Media, ikigo nyafurika gikora itangazamakuru ryibanda ku kugaragaza abantu b’indashyikirwa mu byiciro bitandukanye, cyatangaje ko Abanyarwandakazi Louise Mushikiwabo, Dr. Agnes Kalibata, Dr. Monique Nsanzabaganwa na Minisitiri Ingabire Paula bari mu bagore 100 bavuga rikijyana muri Afurika yose.


Mushikiwabo ni umuyobozi w’Umuryango w’Ibihugu bikoresha Ururimi rw’Igifaransa (OIF), Kalibata ni umuyobozi w’Umuryango Nyafurika uharanira guteza imbere ubuhinzi (AGRA), Nsanzabaganwa ni umuyobozi Wungurije wa Komisiyo ya Afurika Yunze Ubumwe(AU) mu gihe Ingabire we ari Minisitiri w’Ikoranabuhanga na Inovasiyo.


Mbere y’imyaka 28 ishize umunyarwandakazi wakanyakanyaga yagombaga kuba umufororomokazi cyangwa umwarimukazi nabwo mu mashuri abanza cyane ko byari byarabaye ihamwe ko umugore yagombaga gukora imirimo yo mu rugo no guhinga aho abakandagiraga mu ishuri babaga ari mbarwa.


Ubwo RPF/A yatangizaga urugamba rwo kubohora u Rwanda no guhagaruka Jenoside yakorewe Abatutsi, umugore ntiyasizwe inyuma kuko nabo bari mu ngabo aho abandi bakoraga ibikorwa bitandukanye bafatanya na basaza babo.


Ibi ntibyahagarikiye aho kuko na nyuma y’uko jenoside ihagaritswe, umunyarwandakazi yakomeje gushyigikirwa ndetse ubu u Rwanda rukaba aricyo gihugu cya mbere muri Afurika gifite umubare munini w’abagore mu nteko ishinga amategeko bangana na 61.25%.


Ubu abanyarwandakazi bahawe ijambo n’umwanya cyane ko bari mu nzego zitandukanye zifata ibyemezo. Ibi byose babikesha imiyoborere myiza irangajwe imbere na Nyakubahwa Perezida Paul Kagame.


Ugukomeza guteza imbere umugore no kumuha umwanya ni ingenzi cyane kuko byongera imbaraga umwana w’umukobwa ndetse agakura atiheza.


Mu iterambere ry’igihugu kandi umusaruro uragaragara kuko aho u Rwanda rugeze mu myaka 28 gusa ntirwari kuba ruhageze iyo hatabaho ubufatanye bw’abagabo n’abagore. Harakabaho ubuyobozi bushyigikira umugore bukanimakaza uburinganire!


Abagore ntituzatesha agaciro uwakadusubije; iyi ni intego ndetse twiteguye gukomeza gukora ibikorwa bitandukanye by’indashyikirwa ari nako tugira uruhare rufatika mu iterambere ry’igihugu cyacu.


Kayitesi Marthe


Ibikubiye muri iyi nyandiko ni ibitekerezo bwite by’umwanditsi. Kayitesi Marthe ni umubyeyi uhekeye u Rwanda utewe ishema n’umwanya iguhugu cyahaye umunyarwandakazi ngo nawe agire uruhare mu iterambere ry’igihugu.

Leave a Reply

%d bloggers like this: