December 7, 2022

Maj. Karangwa ntiyagizwe umwere ku byaha bya Jenoside…interahamwe nizitonde!

Interahamwe zatorokeye ubutabera hirya no hino ku Isi ziri mu byishimo by’uko ngo ubutabera bw’igihugu cy’u Buholandi buherutse kwanzura ko umwe muri zo, Maj. Pierre Claver Karangwa, atazoherezwa kuburanishirizwa mu Rwanda.

Izi nterahamwe ziganjemo abambari b’ingirwashyaka FDU-Inkingi Karangwa abarizwamo kimwe n’abazungu b’abahezanguni nka Filip Reyntjens, gusa abo bose bari kwikirigita bagaseka cyane ko ruriya rukiko rutigeze rugira umwere uyu mujenosideri.

Ibyo bisobanuye ko uru rukiko rugomba kumuburanisha cyane ko ubutabera bw’u Buholandi bukimukurikirana aho by’umwihariko ataraburana mu mizi ku byaha bya Jenoside yakorewe Abatutsi akurikiranweho.

Abishimira kuba Karangwa atazoherezwa kuburanishirizwa mu Rwanda bishuka ko wenda u Bohalandi buzamudebekera, gusa baribeshya cyane ko icyo gihugu kiri muri mu bikomeje kugaragaza ubushake bwo kuburanisha abajenosideri batorotse ubutabera bw’u Rwanda.

Nk’urugero, ubutabera bw’u Buholandi muri Nyakanga 2011 bwakatiye igifungo cya burundu Mpambara Joseph nyuma yo kumuhamya uruhare yagize muri Jenoside yakorewe Abatutsi.

Ubutabera bw’u Boholandi kandi muri Werurwe 2013 bwakatiye igifungo cy’imyaka itandatu n’amezi 8 Yvonne Ntacyobatabara Basebya nyuma yo kumuhamya kugira uruhare mu gukangurira urubyiruko kwishora muri Jenoside akoresheje indirimbo yahimbye yamamamaye nka “Tubatsembatsembe”.

Mpambara na Ntacyobatabara bose bari barakatiwe igifungo cya burundu n’inkiko gagaca; ibintu bahuriyeho n’uyu Karangwa cyane ko nawe yakatiwe igifungo cya burundu n’inkiko Gacaca z’iwabo ku ivuko i Mugina mu cyahoze ari Gitarama.

Bitinde bitebuke Maj. Karangwa azaryozwa amaraso y’ibihumbi by’inzirakarengane yamennye muri Jenoside yakorewe Abatutsi; abishimira kuba atazaburanishirizwa mu Rwanda bari gukora ubusa cyane ko icyo Abanyarwanda bifuza ari ubutabera kandi bizeye ko u Boholandi buzabutanga nk’uko bwabikoze mu myaka yatambutse.

Mugenzi Félix

Leave a Reply

%d bloggers like this: