December 7, 2022

Depite Mbonimana uherutse kwegura kubera isindwe rikabije yasabye imbabazi Perezida Kagame

Dr. Mbonimana Gamariel uhuretse kwegura mu Nteko ishinga Amategeko, Umutwe w’Abadepite,  kubera kuvugwaho gutwara imodoka yasinze yasabye imbabazi Umukuru w’Igihugu Paul Kagame n’Abanyarwanda muri rusange.

Mbonimana wari wabanje gutangaza ko yeguye ku mpamvu ze bwite, mu gitondo cyo kuri uyu wa Kabiri tariki ya 15 Ugushyingo 2022 yeruye ko ubwegure bwe bushingiye ku businzi bukabije amaze igihe avugwaho.

Mu butumwa yabyutse ashyira kuri Twitter, Mbonimana yanditse ko: “Mbikuye ku mutima mbasabye imbabazi Nyakubahwa Perezida n’Abanyarwanda mwese. Nakoze icyaha cyo gutwara imodoka nanyweye inzoga.”

“Nafashe umwanzuro wo kutazongera kunywa inzoga. Mwumve gutakamba kwanjye. Niteguye kuzuza neza izindi nshingano zose mungiriye icyizere.”

Muri ubu butumwa, Mbonimana yasubizaga ubundi bwari bwatambukishijwe n’Urwego rw’Igihugu rw’Itangazamakuru (RBA) bwarimo amashusho ya Perezida Kagame asaba abarebwa n’iyubahirizwa ry’amategeko abuza abana kunywa inzoga gukurikirana ishyirwa mu bikorwa ryayo.

Kwegura kwa Depite Mbonima ni ikimenyetso cy’uko nta muntu uri hejuru y’amategeko aho by’umwihariko abayobozi babazwa inshingano nk’amwe mu mahitamo u Rwanda rushyize imbere mu rwego rwo kwihutisha iterambere ridaheza.

Hirya yo kubazwa inshingano andi mahitamo ni ugutekereza byimbitse ndetse no kunga ubumwe.

Ubwanditsi

Leave a Reply

%d bloggers like this: