December 7, 2022

Umuryango wa Kabuga Félicien uri kujomba ibikwasi abarokotse Jenoside yakorewe Abatutsi

Abakomoka kuri Kabuga Félicien barangajwe imbere n’umuhungu we, Donatien Kabuga Nshimyumuremyi, bakomeje gutagatifuza uyu mujenosideri kabombo; ibintu biri mu murongo bihaye wo gukomeza gutoneka abarokotse Jenoside yakorewe Abatutsi mu 1994.

Nk’urugero, aba bene Kabuga bateguye icyo bise “imyigaragambyo” yo kwamagana ishami ry’Urugereko rwasigariyeho Urukiko Mpuzamahanga Mpanabyaha rwashyiriweho u Rwanda, IRMCT, rikorera i La Haye mu Buholandi kubera ko ngo iri kuburanisha uyu mujenosideri bo bita “intwali” yabo.

Iyo myigaragambyo iteguwe nyuma y’uko hakomeje kugaragara ibimenyetso ntashidikanywaho bishinga Kabuga kugira uruhare rukomeye muri Jenoside yakorewe Abatutsi aho abatangabuhamya banyuranye bakomeje kugaragaza ibimenyetso byinshi abantu batari bazi.

Bimwe muri ibyo bimenyetso harimo kuba Kabuga yatanze intwaro zo kwica abatutsi; ibintu byahamijwe n’umutangabuhamya wiyemerera kuba yaragize uruhare muri Jenoside. Ni mu gihe hari undi mutangabuhamya wagaragaje uburyo Kabuga yari yarashinze ‘bariyeri’ ku Kimironko mu Mujyi wa Kigali aho yayoboraga ibikorwa byo kwica Abatutsi.

Uyu muhungu wa Kabuga mu kwerekana ko ‘bene samusure bavukana isunzu’ yigeze gutanga ikiganiro ku muzindaro wa YouTube ubarizwa mu kwaha kw’interahamwe avuga ko “ijambo Jenoside ntirikwiye mu Rwanda” kuko ngo “nta jenoside yabayeho”.

Donatien Kabuga Nshimyumuremyi wonkejwe amashereka y’urwango, igihe se yafatirwaga mu nzu yari amaze imyaka yihishahishamo i Paris mu Bufaransa aho yari yari yariyise amazina y’amanye-Congo ya “Antoine Tounga”, uyu Nshimyumuremyi yagerageje kuyobya uburari yivugisha igiswayili nk’umunye-Congo ariko biramupfubana.

Uyu muhungu wa Kabuga kimwe n’izindi nterahamwa bahuje imyumvire yo kwigaragambya baravomera mu rutete cyane ko uwo bashaka gutagatifuza Isi yose izi ibye aho n’urukiko ruzamukanira urumukwiye.

Mugenzi Félix

Leave a Reply

%d bloggers like this: