December 7, 2022

Ubundi bushotoranyi: Umusirikare wa Congo yinjiye i Rubavu arasa ku ngabo z’u Rwanda, ahita ahagwa


Umusirikare utaramenyekana imyirondoro aho bikekwa ko ari uw’ingabo za Congo (FARDC) ma saha y’igicuku yo kuri uyu wa Gatandatu tariki ya 19 Ugushyingo 2022 yinjiye mu Rwanda maze atangira kurasa ku basirikare b’u Rwanda bacunga umutekano w’umupaka.


Ingabo z’u Rwanda (RDF) zahise zivugana uyu musirikare mu rwego rwo kwirinda ko yagira abo akomeretsa cyangwa yica, nk’uko zabitangaje mu itangazo zasohoye. Ibi byaye saa saba z’igicuku mu Mudugudu wa Gasutamo, Akagari ka Mbugangari, Umurenge wa Gisenyi ho mu Karere ka Rubavu.


Itangazo rya RDF rigaragaza kandi ko abasirikare bagize Itsinda ry’Ingabo zo mu Karere zishinzwe kugenzura ibibazo bibera ku mipaka (Expanded Joint Verification Mechanism-EJVM) bamenyeshejwe iki kibazo aho byitezwe ko bagomba gukora iperereza kuri iki gikorwa cyahonyoye ubusugire bw’u Rwanda.



Ku rundi ruhande, uyu musirikare wa Congo abaye uwa gatatu urasiwe mu Rwanda mu mezi atanu ashize; uwa mbere yarashwe muri Kamena ubwo yinjiraga ku mupaka wa “Petite Barrière” akarasa Abapolisi bari ku burinzi no ku baturage bambukaga umupaka.


Undi musirikare yarasiwe mu Mudugudu wa Cyamabuye, Akagari ka Rusura, Umurenge wa Busasamana mu Karere ka Rubavu, mu gace kakunze kunyurwamo n’abarwanyi ba FDLR mu ntangiriro za Kanama.


Aba basirikare barasirwa mu Rwanda birangira ubutegetsi bw’i Kinshasa bubafashe n’intwali; ibintu bishimangira ko ibi aba ari ibikorwa by’ubushotoranyi cyane ko abategetsi b’icyo gihugu badasiba kwikomanga mu gatuza bahamya ko bazashoza itambara k’u Rwanda.


Ibi kandi bije bikurikira ikindi gikorwa cy’ubushotoranyi aho indege y’intambara ya FARDC yo mu bwoko bwa Sukhoi-25 iherutse kuvogera ikirere cy’u Rwanda; ibintu guverinoma y’u Rwanda yamaganye ndetse na Leta ya Congo ikemera ko yakosheje.


Ubwanditsi

Leave a Reply

%d bloggers like this: