February 4, 2023

Ubutegetsi bwa Tshisekedi bukomeje guterera agati mu ryinyo ku kibazo cy’impunzi z’Abanyekongo ziri mu Rwanda

Magingo aya hirya no hino mu Rwana habarizwa impunzi z’Abanyekongo zirenga ibihumbi 70 zihora zizezwa gusubizwa mu gihugu cyazibyaye ariko amaso akaba yaraheze mu kirere.

Izo mpunzi zigize 60.43% by’impunzi zose zicumbikiwe mu Rwanda nk’uko imibare ya Minisiteri ishinzwe Ibikorwa by’Ubutabazi (MINEMA) ibigaragaza. Ni mu gihe izi mpunzi zibarizwa by’umwihariko mu nkambi za Kiziba n’iya Kigeme.

Impamvu nyamukuru izi mpunzi zahunze igihugu cyazo ni ubwicanyi ndengakamere bukorwa n’interahamwe zatorokeye ubutabera bw’u Rwanda muri Congo ndetse n’imitwe y’abarwanyi inyuranye ikorera muri icyo gihugu.

Kuva izi mpunzi zahunga zakomeje kugira ikizere ko zizataha, ariko ubuyobozi bwagiye busimburana muri Congo ntawigeze aha agaciro ikibazo cyazo. Ubutegetsi bwa Tshisekedi nabwo bwatereye agati mu ryinyo ndetse burengaho bakorana n’imitwe y’iterabwoba nka FDLR aba banyekongo bahunze.

Ingengabitekerezo ya Jenoside muri Kivu zombi ikomeje gukwirakwizwa by’umwihariko n’umutwe w’iterabwoba wa FDLR, ibintu bikomeje kumunga iki gihugu no gushyira mu kaga abaturage bavuga Ikinyarwanda ndetse bikaba byaratumye ikizere cy’Abanyekongo bahungiye mu mahanga kiyoyoka.

Ubwo Tshisekedi yatorerwaga kuyobora Congo mu rwiyerurutso rwinshi yatangaje ko afite ubushake bwo gufatanya n’ibihugu byo mu karere kurwanya imitwe yitwaje intwaro ikomeje kuyogoza igihugu cye; ibintu byatumye impunzi z’abanyekongo zigira ikizere ko zishobora kuzasubira mu gihugu cyabo nyuma y’igihe kirekire, gusa nk’uko bigaragara ikizere cyabo cyaraje amasinde.

Usibye kuba ubutegetsi bwa Tshisekedi ntacyo bwakoze ngo ziriya mpunzi zitahuke nk’uko zibyifuza, n’abasigayeyo bari kugeragerezwaho Jenoside uko bwije n’uko bukeye kandi bihagarikiwe n’ingabo za Tshisekedi aho by’umwihariko zamaze kwihuza na FDLR.

Ku rundi ruhande, u Rwanda rutanga umusanzu munini kugira ngo ziriya mpunzi zibeho neza ndetse zinabone ibyangobwa by’ingenzi zikenera nk’uburezi, ubuvuzi, umutekano usesuye n’ibindi.

Impunzi z’abanyekongo zihanze amaso Umuryango Mpuzamahanga ko hari icyo wakora kuko Leta ya Tshisekedi yananiwe kugarura umutekano mu gihugu cyabo mu gihe bafite uburenganzira bwo kugira igihugu.

Umulisa Carol

Leave a Reply

%d bloggers like this: