February 4, 2023

Impuruza kuri Bicahaga ukomeje kwangisha Abanyarwanda ubuyobozi bitoreye

Bicahaga Abdallah, umusaza wabaswe n’ingengabitekerezo ya Jenoside noneho yadukanye umuvuno mushya wo kugumura abanyarwanda abereka ko ngo nta kintu ubuyobozi burangajwe imbere n’Umuryango RPF-Inkotanyi bubamariye.

Iri cengezamatwara Bicahaga akomeje kurinyuza ku muzindaro we wa YouTube aho by’umwihariko aherutse kumvikana avuga ko RPF ari yo “ntandaro y’ubukene mu Rwanda”.

Imvugo z’uyu muhezanguni ni izo kuyobya rubanda cyane ko ahubwo Umuryango RPF-Inkotanyi umaze imyaka 28 uzahura iterambere ridaheza rya buri muturarwanda; ibintu bigaragarira buri wese aho by’umwihariko bishimangirwa n’ubuhamya abaturage ubwabo batanga bavuga imyato uyu muryango wabohoye igihugu unahagarika Jenoside yakorewe Abatutsi mu 1994.

Bicahaga ushaje wanduranya, afite ingeso yo gukwirakwiza ibinyoma agamije kwangisha abaturage ubuyobozi, nk’urugero, mu isoni nke yavuze ko “mu Rwanda hari ubukene buteguwe neza”, imvugo idakwiye kugira uwo irangaza cyane ko Leta y’u Rwanda buri mwaka ishyiraho gahunda zigamije kuzamura iterambere ry’Abanyarwanda aho izi gahunda zitanga umusaruro ugaragarira buri wese.

Uyu muhezanguni ntashobora kuvuga ko mu myaka 28 ishize RPF nka moteri ya guverinoma yashyize imbere gushaka iterambere ry’umuturage, aho yashyizeho gahunda nyinshi  zigamije guteza imbere imibereho myiza y’abaturage no kuzamura ubukungu bwabo.

Muri izo gahunda harimo Girinka, VUP, Ubudehe, uburezi kuri bose ndetse n’izindi nyinshi zinyuranye Bicahaga azi neza ariko agahitamo kuzirenza ingohe kubera ubuhezanguni bwamurenze.  

Bicahaga akwiye kumenya ko abanyarwanda bahisemo gukorera hamwe mu gushaka icyabateza imbere ntawe usigaye inyuma bityo bakizerera mu guhuza imbaraga. Ni muri urwo rwego benshi bihurije mu makoperative bazahaza ubukene ndetse n’ibindi byinshi bitanga umusaruro ufatika.

Uyu musaza kandi akwiye kwibuka ko Abanyarwanda bahisemo ubumwe n’ubwiyunge aho guhitamo urwango na munyangire we ashyize imbere, akaba ari yo mpamvu ibyo akora byose aba agosorera mu rucaca.

Abanyarwanda kandi bazi neza amateka yabo ndetse n’ibyakozwe kugira ngo bongera babone amahoro; akaba ari yo mpamvu bazakomeza kubaera igihugu cyabo inyangamugayo batitaye ku bashaka kubangisha ubuyobozi bwabo nk’uyu Bicahaga.

Inzego zishinzwe iyubahirizwa ry’amategeko zikwiye gushyira ijisho ku muhezanguni Bicahaga kuko akomeje kugomera umuryango nyarwanda.

Mukobwajana Linda

Leave a Reply

%d bloggers like this: