December 7, 2022

Ntawe utokora Ifuku! Umuhezanguni Bicahaga yerekanye ko adateze guhinduka

Umuhezanguni Bicahaga Abdallah yagaragaje ko adateze kwitandukanya n’ingengabitekerezo ya Jenoside ahora ahembera ku mbuga nkoranyambaga n’ubwo bwose Urwego rw’Igihugu rushinzwe Ubugenzacyaha (RIB) rwamugiriye inama yo kwisubiraho.

Ku wa kabiri tariki ya 8 Ugushyingo 2022 nibwo Bicahaga yitabye ku kicaro gikuru cya RIB giherereye ku Kimihurura mu Mujyi wa Kigali, nyuma y’amasaha macye avuye kwitaba uyu muhezanguni yahise yirukira ku muzindaro we wa YouTube ndetse n’indi mizindaro bakorana maze atangariza abo yita “abakunzi” be uko byamugendekeye.

Uyu muhezanguni yasobanuye ko umugenzacyaha yamweretse ko mu magambo avuga mu biganiro bitandukanye akorera kuri YouTube harimo agize ibyaha bihanwa n’amategeko.

Bicahaga wigize intiti mu mateka nyamara ahubwo ari igikoresho cy’interahamwe dore ko aba azivugira ibyo zifuza, yaje kwemera ko ibyo yakoraga bigongana n’amategeko gusa icyatangaje abantu ni uburyo ku muzindaro we yatangaje ko atazigera ahagarara mu kuvuga ibyo we yita “amateka nyakuri” nyamara ahubwo ari ukuyagoreka.

N’ubwo bwose Bicahaga yemeye ko yakoze ibyaha, nta na hamwe yigeze asaba imbabazi ku byo yatangaje bigize icyaha ahubwo yavuze ko agiye kujya yirinda icyatuma agwa mu mutego ngo akica “amategeko yashyizweho na FPR Inkotanyi”, imvugo ishimangira ko uyu muhenzanguni adateze guhinduka.

Nk’urugero Bicahaga yigeze kuvuga ko ngo “ihanurwa ry’indege ya Habyarimana ni ryo  ryatumye habaho Jenoside yakorewe abatutsi”, gusa ikibabahe ni uburyo nyuma yo kuganirizwa na RIB atasabye imbabazi Abanyarwanda kuri iyi mvugo ye y’ikinyoma iha ishingiro Jenoside yakorewe Abatutsi.

Mu cyumweru gishize undi muhezanguni Nkusi Uwimana Agnes nawe RIB yaramuhamagaje imwereka ibyaha atasibaga gukorera ku muzindaro we wa YouTube, gusa we yatangaje ko agiye guhindura umurongo ndetse anasaba imbabazi abo yakomerekeje.

Nta muntu n’umwe mu bafungiwe ibyaha bakoreye kuri YouTube utarabanje kwerekwa ko ibyo yarimo ari ibyaha, gusa kubera inda zabo zabatanze imbere babirengagaho bagakomeza gushukwa n’izo nterahamwe aho magingo aya barafunzwe mu gihe ababakoreshaga bo bigaramiye.

Bicahaga na bagenzi be bakwiye kumenya ko ibyo bahisemo byo kuba imiyoboro interahamwe zicishamo uburozi bwazo bitazabahira kuko u Rwanda rugendera ku  mategeko; mu gihe barenze umurongo utukura amategeko ntazabadebekera.

Mugenzi Félix

Leave a Reply

%d bloggers like this: