January 30, 2023

Musana Jean Luc n’agatsiko ke muri “misiyo” yo kugumura Abanyarwanda no gushimisha ibigarasha n’interahamwe

Hagiye gushira imyaka ibiri ku mbuga nkoranyambaga hadutse uwitwa Musana Jean Luc umenyereweho gushakira indonke kuri YouTube binyuze mu kwiyita “umunyapolitike”, ibintu akora agamije kugumura Abanyarwanda no gushimisha abanzi b’u Rwanda bakorana umunsi ku wundi.

Byatangiye uyu muhungu ubarizwa mu Mujyi wa Kigali avuga ko afite “ishyaka” cyangwa umutwe wa politike, gusa byari amaco y’inda cyane kuko icyo yita ishyaka nta hantu na hamwe cyanditswe mu Rwanda cyane ko atateye intambwe ngo agisabire ibyangombwa.

Musana udasiba kuvuga ko akeneye “gufungwa” cyangwa “kwicwa” kugira ngo agere ku “ntsinzi” y’icyo yita urugamba ariho, yashoboye kwiyegereza rumwe mu rubyiruko bahuje imyumvire y’ubuhezanguni, aba akaba ari bo bafatanyabikorwa be b’ibanze mu murongo ugayitse yihaye wo kuyobya Abanyarwanda ku mbuga nkoranyambaga.

Mu bakurikiye buhumyi Musana bakaba by’umwihariko basimburana ku muyoboro wa YouTube yashinze harimo uwitwa Uwimbabazi Eric usanzwe ukora itangazamakuru na Ntaganzwa Aimé Désire uvuga ko akora akazi k’ibaruramari.

Abo bagabo uko ari babiri basimburana na Musana mu gukwirakwiza icengezamatwara rica igikuba mu Banyarwanda binyuze mu biganiro badasiba gutambutsa kuri YouTube aho baba biyambitse umwambaro wo kuvugira abaturage.

Rumwe mu rugero rwa hafi rw’aho Musana n’aga gatsiko ke bashimangiye ko bagamije kugumura Abanyarwanda ni igihe bakoreshaga ikiganiro abasore babiri bahoze bacumbikiwe mu nzu ya “One Dollar campaign Complex” .

Abo basore bavugaga ko “birukanwe” muri iriya nyubako ariko biza kugaragara ko abo basore bari bapakiwemo ibinyoma bagomba kuvuga kuko amasezerano y’uko baza muri iriya nyubako bari bayazi mbere yo gucumbikirwa.

Musana kandi aherutse gukora ikiganiro ahamagarira abagikurikiye guhaguruka bakajya mu mutwe w’iterabwoba wa FDLR wiganjemo interahamwe zasize ikoze Jenoside yakorewe abatutsi muri 1994.
Byari mu icengezamatwara rigamije gutanya abanyarwanda no kubagumura ngo bajye gupfira mu mashyamba ya Congo aho bari guhungabanya umutekano w’ibihugu byo mu biyaga bigari by’umwihariko u Rwanda.

Ntibitangaje na gato ko Musana yagaragara agumura abanyarwanda kujya muri FDLR, kuko nawe yigeze kwerura ko ateganya gukorana nayo aho nawe yunganga mu byo abajenosideri, interahamwe n’ibigarasha bahora bavuga ko u Rwanda rukwiye kugirana ibigaraniro n’uwo mutwe.

Mu busanzwe, umurongo Musana n’aka gatsiko ke bihaye ni uwo kurangaza abanyarwanda, guha ijambo ababarizwa mu mitwe y’iterabwoba by’umwihariko umuterankunga wabo ukomeye Ingabire Victoire Umuhoza bakorana bya hafi.

Abakurikira Musana n’abo bakorana bakwiye kumenya ko nta kindi bagamije usibye gushakira ibibazo aho bitari, kuzamukira ku bantu babizeza ibitangaza no kubashakira ubuvugizi nyamara umugambi ari uwo kubaboneraho amaramuko.

Ellen Kampire

Leave a Reply

%d bloggers like this: