February 4, 2023

Ubundi bushotoranyi: Indege y’intambara ya Congo yavogereye ikirere cy’u Rwanda, iraswaho!

Kuri uyu wa Kabiri ahagana saa kumi n’imwe z’umugoroba, indege y’ntambara  ya Repubulika Iharanira Demokarasi ya Congo yo mu bwoko bwa Sukhoi-25 yavogereye u Rwanda ku nshuro ya gatatu maze ingabo z’u Rwanda ziyirasaho isubira muri Congo iri gushya.

U Rwanda rwasabye RDC guhagarika ubu bushotoranyi nk’uko bigaragara mu itangazo guverinoma y’u Rwanda yasohoye yemeza iby’iki kibazo.

Iri tangazo rigaragaza kandi ko iriya ndege yarashweho nk’ingamba z’ubwirinzi zahise zifatwa.

Hari amafoto yagaragaye iyo ndege iparitse ku kibuga cy’Indege cya Goma irimo kuzimywa.

Hirya yo kuba indege z’intamba za Congo zikomeje kuvogera ikirere cy’u Rwanda, Congo ntisiba gushotora u Rwanda ishaka kurushora mu ntambara cyane ko Perezida Tshisekedi ahora avuga ko azatera u Rwanda.

Ubundi bushotoranyi Congo yakoreye u Rwanda burimo kuba mu mwaka ushize wa 2022 ingabo z’icyo gihugu(FARDC) zifatanyije n’umutwe w’iterabwoba wa FDLR zarashe mu Rwanda ibisasu byo mu bwoko bwa “rockets” inshuro eshatu.

FARDC-FDLR kandi yashimuse abasirikare babiri b’u Rwanda basanzwe mu Rwanda ubwo bari ku burinzi, ni mu gihe kandi hari umusirikare nawe winjiye mu Rwanda maze arasa ku basivili n’inzego zishinzwe umutekano z’u Rwanda.

Ibi byose biri kuba mu gihe kandi ubutegetsi bwa Tshisekedi bukomeje guhonyora nkana amasezerano y’amaho yasinyiwe i Luanda n’ayasinyiwe i Nairobi.

Mugenzi Félix

Leave a Reply

%d bloggers like this: