February 4, 2023

Umuryango Mpuzamahanga ntukwiye gukomeza kurebera ubutegetsi bwa Tshisekedi buvogera ubusugire bw’u Rwanda

Igihugu cya Repubulika iharanira Demokarasi ya Congo gikomeshe ibikorwa by’ubushotoranyi ku Rwanda gusa igitangaje ni uburyo Umiryango Mpuzamahanga ikomeje guterera agati mu ryinyo mu gihe ubu bushotoranyi bushobora kubyara amakimbirana akomeye hagati y’ibihugu byombi.

Nk’urugero, kuri uyu wa Kabiri tariki ya 24 Murarama 2023, indege y’intambara yiki gihugu yongeye kuvogera ikirere cy’u Rwanda ku nshuro ya gatatu mu gihe kitageze ku mezi atatu.

Ni mu gihe nanone tariki ya 29 Ugushyingo 2022, indege y’intambara yari yongeye kuvogera ikirere cy’u Rwanda ihita isubira muri Congo; icyo gihe hari hashize ibyumweru bitatu gusa indi ndege y’igisirikare cya Congo ivogereye ikirere cy’u Rwanda ndetse igwa umwanya muto ku kibuga cy’indege cya Rubavu.

U Rwanda rwakomeje kwamagana ubushotoranyi bwa RDC, bituma ku nshuro ya gatatu indege yari ivogereye ikirere cy’u Rwanda ingabo z’igihugu (RDF) ziyirasaho maze isubira muri Congo iri gushya.

Ibikorwa by’ubushotoranyi by’iki gihugu kandi bimaze iminsi kuko muri Gicurasi na Kamena ingabo za Congo (FARDC) zifatanyije n’Umutwe w’iterabwoba wa FDLR barashe mu Rwanda inshuro zirenga eshatu ibisasu biremereye byo mu bwoko bwa ‘rockets’.

Si ukuvogera ikirere cy’u Rwanda no kurasa ku butaka gusa, kuko ingabo za FARDC zifatanyije n’umutwe wa FDLR bashimuse abasirikare babiri b’u Rwanda ubwo bari ku burinzi; ibintu byakurikiwe no kuba umusirikare wa FARDC yarinjiye mu Rwanda arasa abapolisi b’u Rwanda gusa ntibyamuhiriye kuko nawe yahise ahasiga ubuzima.

Igihe kirageze ngo ubushotoranyi bwa Congo bushyirweho iherezo ndetse n’abategetsi ba Kinshasa bakomeje kubigiramo uruhare bakwiye gufatirwa ibihano ritararenga.
Umuryango Mpuzamahanga n’ubutegetsi bwa Tshisekedi bwakwiye kumenya ko u Rwanda rudateze kwicara ngo rurebere ubusugire n’umutekano w’abaturage barwo bivogerwa.

Umulisa Carol

Leave a Reply

%d bloggers like this: