U Bufaransa bwanze ko umupfu w’umujenosideri Zigiranyirazo Protais abunukira!
Ubuyobozi bw’umujyi wa Orleans mu Bufaransa bwitambitse igikorwa cyo gushyingura umurambo w’umujenosideri kabombo Zigiranyirazo Protais wayoboye Perefegitura ya Ruhengeri akaba na muramu w’umunyagitugu Habyarimana Juvenal “Kinani”.
Ni icyemezo uyu mujyi wafashe kuri uyu wa Kabiri ku itariki ya 26 Kanama 2025, mu gihe umuryango w’uyu mujenosideri witeguraga kuzamushyingura mu gitondo cyo ku wa kane tariki ya 28 Kanama 2025.
Iki cyemezo cyatitije abajenosideri bihishe mu bufaransa n’ahandi kuko gishimangira ko izo nkoramaraso nta buturo zikwiye kuri Si.
Ibaruwa y’ubuyobozi bw’umujyi wa Orleans ibuza uwo muhango igira iti : “Dushingiye ku ruhare rukomeye nyakwigendera Zigiranyirazo Protais yagize muri Jenoside, twemeje ko uruhushya mwahawe rusheshwe kuko tutari tuzi amabi yamuranze akiriho, kuko byaba ari ugutoneka abarokotse Jenoside yakorewe Abatutsi.”
Zigiranyirazo wahawe akabyiniriro ka “Mr Z” ari mu bajenosideri barekuwe n’Urukiko mpuzamahanga mpanabyaha rwashyiriweho u Rwanda bajyanwa muri Niger kuko ibihugu byose kuri iyi Si byanze kubakira mu gihe bo bavugaga ko badashaka kugaruka mu Rwanda nk’igihugu basize bagize umuyonga.
Soma kandi: Abajenosideri bakomeje kubuyera muri Niger bakwiye gutahuka mu rwababyaye: Dore impamvu!
Icyemezo cy’ubuyobozi bw’umujyi wa Orleans gishimangira ko Perezida Emmanuel Macron agikomeye ku magambo yavugiye mu Rwanda mu mwaka w’2021 aho yatangaje ko u Bufaransa budashobora kuba ubuturo bw’abajenosideri.
Iyi nkuru y’incamugongo ku bajenosideri n’udutsiko tubashyigikiye ikwiye gutanga ubutumwa bukomeye bubibutsa ko batsinzwe burundu, kandi ko umuvumo wo kuba baragize uruhare muri Jenoside yakorewe Abatutsi mu 1994 uzahora ubakurikirana.
Ndayambaje Marc
About Author
