Musabyimana wa FDU-Inkingi/FDLR akomeje kotsa imiteja!
Umuhezanguni akaba n’umumotsi w’agatsiko ka FDU-Inkingi, Musabyimana Gaspard akomeje kwerekana ko yanywanye n’umutwe w’iterabwoba wa FDLR awutagatifuza ko ari “impunzi”.
Ibi uyu muhezanguni Musabyimana yabivugiye ku muzindaro we rutwitsi asanzwe akoresha acengeza amatwara y’interahamwe n’abajenosideri bihishe hirya no hino ku Isi, ari nako ashaka kuyobya Abanyarwanda no gusiga icyasha ubuyobozi bw’u Rwanda burangajwe imbere n’Umuryango FPR-Inkotanyi.
Musabyimana yumvikanye mu gahinda kenshi abeshya ko amasezerano y’amahoro ya Washington agizwe n’ingingo zirimo gusenya FDLR ibangamiye umutekano w’u Rwanda n’akarere muri rusange avuga ko ari ayo “guhiga impunzi” izo mpunzi uwo musazi ni FDLR.
Mu by’ukuri FDLR uyu muhezanguni atagatifuza ni umutwe w’iterabwoba washinzwe n’interahamwe zasize zikoze Jenoside yakorewe Abatutsi mu 1994, hanyuma zose zihungira muri Repubulika Iharanira Demokarasi ya Congo ngo zisuganye zigaruke mu Rwanda zikureho ubuyobozi bwa FPR-Inkotanyi zishyireho ubwa Hutu-Pawa zirangize akazi zitasoje ko kumara Abatutsi.
Uyu musaza usaziye mu matiku n’ingengabitekerezo ya jenoside,atagatifuza FDLR yanavuze ko “abari bayigize ubu bose barashaje,ntibashobora kurwana ”ndetse n’abayirimo bato batarwana ahubwo bose ari impunzi ziba muri Kongo zidafite ikibazo ziteye u Rwanda.
Musabyimana iyo abunza ibyo binyoma yirengagiza ko FDLR itari abantu gusa ahubwo ari ingengabitekerezo kirumbuzi y’amacakubiri n’urwango rwibasira ABatutsi, no kwihorera ku FPR-Inkotanyi yahagaritse Jenoside izo nterahamwe zakoreraga Abatutsi.
FDLR kandi iri ku isonga y’ihungabanywa ry’umutekano mu karere k’ ibiyaga bigari. Mu myaka isaga 30, FDLR imaze kwica Abanye-Congo babarirwa mu ma miliyoni. Iyi FDLR yagiye kenshi igaba ibitero ku butaka bw’ u Rwanda bimwe byahitanye abantu bikanangiza n’ ibyabo n’ubwo umuhezanguni Musabyimana avuga ko nta gitero na kimwe yigeze igaba ku Rwanda.
Musabyimana akwiye kumenya ko izo nkoramaraso zigize umutwe w’iterabwoba wa FDLR ari abanyabyaha ntaho bahuriye n’ impunzi ari kuzitirira dore ko Abanyarwanda FDLR yari yaragwatiriye bamaze iminsi bacyurwa ari nako baburira abandi bakiriyo gutaha ndetse ko mu Rwanda ari amahoro.
Mukobwajana Linda
About Author
