06-12-2023

BBC “Gahuzamiryango” ikomeje kuba ijwi ry’abahindanya isura y’u Rwanda

0

Bikomeje kugaragara ko Radiyo BBC Gahuzamiryango igitsimbaraye ku mpamvu zatumye ihagarikwa kumvikana ku butaka bw’u Rwanda mu myaka umunani ishize nyuma yo gutangaza inkuru z’impuha ziharabika igihugu n’abayobozi bacyo.

Muri izo nkuru iyi radiyo ivugira mu Bwongereza yatangaje harimo filimi mbarankuru yiswe “Rwanda’s Untold Story”, ihakana Jenoside yakorewe Abatutsi ikibasira n’abayobozi bakuru b’igihugu.

Kuri uyu wa 18 Gicurasi 2022 iyi radiyo mu ijwi ry’umunyamakuru wayo Robert Patrick Misigaro yongeye gushimangira umurongo yiyemeje gufata k’u Rwanda maze itangaza ikindi gihuha ko ngo “gereza z’u Rwanda zikorera iyicarubozo abagororwa.”

Muri iyo nkuru BBC iha ijambo Ingabire Victoire wiyita “umunyapolitike” akemeza iby’iryo “yicarubozo” agendeye ku gihuha giherutse gukwirakwizwa na Uwimana Nkusi Agnes.

Uyu Uwimana aherutse gusohora amashusho y’iminota 41 yiriza cyane aho aba avuga ko yakorewe “iyicarubuzo” n’abacungagereza ubwo yajyaga gusura Niyonsenga Dieudonné wiyita ‘Cyuma Hassan’ uyu akaba afungiwe muri Gereza ya Nyarugenge.

Abantu bari biteze ko BBC nk’igitangazamakuru mpuzamahanga kiri bunonosore ibyatangajwe na Uwimana kugira ngo kimenye aho ukuri kuri (ibyo mu itangazamakuru ry’umwuga bita facts checking) cyane ko nawe ibyo yavuze byose nta kimenyetso yigeze abigaragariza.

Gusa iki gitangazamakuru kiyemeje guhonyora amahame y’umwuga w’itangazamakuru maze gitangaza icengezamatwara rya Ingabire kandi kizi neza ko uyu mugore nta rwego na rumwe ruvugwa mu byo Uwimana yatangaje ahagarariye.

Uko BBC Gahuzamiryango yitwara k’u Rwanda bituma hari abemeza ko ikwiye kuba yitwa “Gatanyamiryango” cyane ko yiyemeje kuba ijwi ry’abadashakira ineza abanyarwanda harimo abajenosideri batorotse ubutabera bw’u Rwanda, ibigarasha byihishe hirya no hino ku Isi ndetse n’imitwe y’iterabwoba yiyita ko irwanya u Rwanda.

Mugenzi Félix

About Author

Leave a Reply

%d